Johnson dhe Sunak zhvilluan ‘bisedime natën vonë’ – nxitën spekulime se mund të arrijnë një marrëveshje për kryeministrin e ardhshëm të Britanisë

Boris Johnson dhe Rishi Sunak thuhet se kanë zhvilluar bisedime deri në orët e vona të natës – duke nxitur spekulimet se mund të arrijnë një marrëveshje.

As ish-kryeministri dhe as ish-kancelarja nuk janë deklaruar zyrtarisht në garën për të pasuar Liz Truss si kryeministër, shkruan Sky News, përcjell Telegrafi.

Ndërkohë BBC raporton se Boris Johnson dhe Rishi Sunak kanë zhvilluar bisedime ndërsa po i afrohen afatit përfundimtar për nominimet në garë për të zëvendësuar Liz Truss si kryeministre.

Dy burime të veçanta i thanë BBC-së se takimi u zhvillua, por asnjëri nga kampet nuk ka bërë të ditur se çfarë kanë diskutuar, përcjell Telegrafi.

Rishi Sunak vazhdon të gjendet përpara në garë, duke mbledhur mbështetjen e 128 deputetëve nga të gjitha krahët e partisë së tij, përfshirë ish-aleatët e Johnson.

Johnson është në vendin e dytë me 53 mbështetës, sipas të dhënave të BBC-së.

Megjithatë, ekipi i tij pretendon se ai ka mbështetjen e 100 deputetëve – numri i nevojshëm për të hyrë zyrtarisht në garë.

Mbështetësit e Sunak ngritën dyshime mbi këtë dhe i kërkuan ish-kryeministrit të tregonte prova.

Penny Mordaunt është e vetmja kandidate që ka deklaruar zyrtarisht se është në garë, por ajo mbetet prapa në mbështetjen me 23 deputetë. /Telegrafi/