Bien çmimet e karburanteve në tregjet ndërkombëtare

Çmimet e naftës ranë nën 95 dollarë sot në tregjet ndërkombëtare nën presionin e frikës së një recesioni dhe një rigjallërimi të infeksionit COVID-19 në Kinë, duke nxitur shqetësimet për kërkesën.

Në tregun e Londrës, një fuçi naftë u tregtua pas mesditës me 1.63 dollarë më të ulët se çmimi i mbylljes së djeshme prej 94.56 dollarë. Në tregun amerikan, çmimi i tij ra me 1.88 dollarë, në 89.31 dollarë. Tregjet u shqetësuan sot nga parashikimet e zymta për ekonominë botërore.

Presidenti i Bankës Botërore, David Malpass dhe drejtoresha e Fondit Monetar Ndërkombëtar (FMN), Kristalina Georgieva, paralajmëruan dje për rritjen e rrezikut të një recesioni global, duke vënë në pah problemin e inflacionit të lartë kokëfortë.

“Ka një pesimizëm në rritje në tregje”, tha eksperti i OANDA-s, Craig Erlam, dhe Naeem Aslam i Avatrade tregon një sërë paralajmërimesh për ngadalësimin e rritjes ekonomike globale.

Ishte frika e recesionit që uli çmimin e naftës nga niveli 147 dollarësh që kishte arritur në fillim të pushtimit rus të Ukrainës, nxitur nga frika për furnizime nga Rusia në kushtet e sanksioneve të ashpra ndaj Moskës.

Çmimet u rënduan sot nga një dobësim i mundshëm i mëtejshëm i kërkesës në Kinë pasi autoritetet shtuan testimin për coronavirusin në Shangai dhe qytete të tjera të mëdha për shkak të rritjes së përsëritur të numrit të personave të infektuar me coronavirus.

Kërkesa pengohet edhe nga dollari i fortë, i cili arriti nivelin më të lartë në disa vite, duke ulur fuqinë blerëse të blerësve me monedha të tjera.

Një rënie më e ndjeshme e çmimeve u parandalua nga furnizimi i ngushtë dhe njoftimi i Organizatës së Vendeve Eksportuese të Naftës (OPEC) dhe aleatëve të saj, përfshirë Rusinë, se do të ulin nivelin e synuar të prodhimit me dy milionë fuçi në ditë nga nëntori.

“Furnizimi mund të jetë i pamjaftueshëm edhe vitin e ardhshëm sepse, sipas vendimit të OPEC+, vendimi për uljen e prodhimit duhet të mbetet në fuqi deri në fund të vitit 2023”, kujtojnë analistët e Commerzbank.

Në një raport të veçantë, OPEC njoftoi sot se një fuçi e shportës së naftës të anëtarëve të tij qëndroi në 99.13 dollarë të hënën, që do të thotë se çmimi u rrit me 1.7 dollarë. /Telegrafi/