Pacientët me kancer ankohen për pritjet në Institutin e Radiologjisë, arsyetohet ministri Sali: Kemi mungesë kuadri

Teksa ministri Bekim Sali hodhi në treg sistemin e ri angiografik të teknologjisë së fundit për procedurat intervenuese radiologjike, pacientët me sëmundje malinje reagojnë se prej muajsh presin rezultate në Institutin e Radiologjisë.

Thonë se jemi të lodhur duke ardhur e rikthyer çdo ditë, ndërkohë që sëmundja mund të përparojë.

Ministri Sali pranon se po përballen me problemin e dhënies në kohë të rezultateve, por arsyen e lokalizon në periudhën e paskovidit, e cila është e vështirë për çdo sistem shëndetësor.

Vonesat në diagnostifikim për shkak të kufizimeve të punës në objektet shëndetësore, paaksesueshmërisë së pacientëve për shkak të izolimit dhe mos shkuarjes në kontrolle, e një sërë gjërash të tjera bënë që lista e pritjes të rritet.

Fluksi i pacientëve në pandemi nuk mund të sistemohej në kohë në asnjë institucion shëndetësor.

Ai e sheh zgjidhjen në blerjen e pajisjeve dhe softuerëve të rinj që do të viheshin në përdorim deri në janar.

I pyetur për zëvendësimin e tij të mundshëm, ministri thotë se nuk ka pasur të dhëna të tilla.

Mendoj se një ndryshim i mundshëm do të ishte me kërkesë të kryeministrit dhe jo të individëve apo nismëtarëve të ndonjë ndryshimi të një pjese të ekipit të qeverisë, sepse kryeministri është ai që i propozon parlamentit dhe ai voton, dmth mbështet një format të tillë qeverisjeje.

Sali shton se dëshiron të promovojë pajisje të reja që do të jenë të dobishme për pacientët, por ka mungesa në stafin e Institutit të Radiologjisë.

Makinat e reja po mbërrijnë në klinika, por nuk ka staf të trajnuar për të lexuar rezultatet.