Osmani iu bën thirrje grave iraniane të mos heqin dorë nga të drejtat e tyre

Presidentja e Kosovës, Vjosa Osmani, iu ka bërë thirrje grave iraniane që të mos heqin dorë nga të drejtat e tyre.

Këtë thirrje ajo e ka bërë përmes një deklarate dhënë për gazetaren iraniane, Masih Alinejad.

Në mesazhin e saj, Osmani ka thënë se lufta për liri kërkon çmim të lartë për ta paguar dhe këtu ajo ka përmendur edhe vuajtjet e Kosovës gjatë luftës së fundit.

“Gjithë bota po ju vështron. Mesazhi im për gratë dhe popullin e Iranit është që kurrë të mos hiqni dorë nga liritë tuaja. Kurrë mos hiqni dorë. Ne e dimë sa e vështirë dhe e dhimbshme është, por lufta për liri kërkon çmim të lartë për ta paguar. Ne kemi paguar çmim të lartë në luftën tonë për liri. Jemi me ju derisa të fitoni. Kurrë mos u dorëzoni”, ka thënë Osmani në një video mesazh.

“Njerëzit e Kosovës ishin viktima të një regjimi gjenocidal. E dimë se në këto situata janë gratë që vuajnë më së shumti, por edhe gratë janë ato që udhëheqin ndryshimin. Është e rëndësishme të mos dorëzoheni kurrë në luftë për liri. Ka qenë shumë e vështirë, por sot jemi pjesë e një shteti demokratik siç është Kosova”, është shprehur tutje ajo.

Ndryshe, mesazhi mbështetës i Osmanit për gratë dhe popullin iranian vjen pas rastit të rëndë të një vajze me origjinë kurde, e cila vdiq në një spital iranian pasi u arrestua nga policia fetare për shkelje të kodit të rreptë të veshjes së Republikës Islamike.

22-vjeçarja Mahsa Amini udhëtoi me familjen e saj nga Kurdistani iranian në kryeqytetin Teheran, ku u arrestua nga “policia e moralit” për mos mbajtje të hixhabit.

Dëshmitarë të shumtë thanë se vajza u rrah në një furgon policie, por policia iraniane i hodhi poshtë pretendimet si akuza të pabaza. /Telegrafi/

“Don’t give up your fight, the world is watching Iranian women”

Kosovo President Vjosa Osmani talk directly to Iranian women through my live Instagram.
The brutal death of #MahsaAmini is becoming a turning point for Iranian women and a tipping point for the Islamic Republic. pic.twitter.com/7WsNzsvJ0y

— Masih Alinejad ?️ (@AlinejadMasih) September 27, 2022