Haziri në Konventën e LDK-së: S’bëhemi kurrë ‘kukulla’ të pushtetit

Nënkryetari i Lidhjes Demokratike të Kosovës, Lutfi Haziri, ka deklaruar se Konventa Programore e kësaj partie që u mbajt sot në Gjilan, ka dëshmuar se “LDK do ta bëjë rikthimin e madh”.

Përmes një postimi në Facebook, Haziri ka thënë se LDK-ja nuk do të bëhet asnjëherë ‘kukull’ e pushtetit.

“Përkundër faktit që në Gjilan jemi opozitë, në mënyrë të vazhdueshme po ofrojnë këshilla dhe sugjerime, mirëpo ato nuk po dëgjohen nga pushteti i sotëm,  i cili e fituar një zyre por e ka humbur qytetarin”, ka shkruar ai.

“Në këtë Konventë madhështore, e konfirmojmë kështu bashkë e me unitet të plotë se ne nuk bëhemi kurrë ‘kukulla’ të pushtetit sepse nga qendra e investimeve më të mëdha publike, VV e futi Gjilanin në depresion të thellë politik e ekonomik”.

Sipas tij, është shqetësues që asnjë investim i ri brenda dhjetë muajve nuk ka ndodhur deri sot në Gjilan nga kjo administratë.

“Po administrojnë me Komunën siç po administron me Republikën shefi i tyre politik. Është fatkeqësi dhe zhgënjim i madh për qytetarët se ky vit është i humbur për Gjilanin. Interesi ynë është që ky vit i humbur të kompensohet me bashkëpunim e aktivizëm, duke u bazuar në rregullore dhe Ligjin për Vetëqeverisje Lokale”, shtoi Haziri. /Telegrafi/