A mungon një libër për kokë banori?!

Nga: Bajram Mjeku

Në vitin 1988, më saktë në kohën kur isha student dhe ndiqja kurset e fundit në Fakultetin e Filologjisë, njëri nga redaktorët e të përdyjavshmes për kulturë e letërsi “Fjala”, më pat propozuar që të shkruaja një artikull se si në Kosovë mungonte një libër për kokë banori!

Mbaj mend se në shkrimin tim, pata përfshirë opinione të shkrimtarëve, gazetarëve dhe studiuesve të kohës se pasja e një libri për kokë banori, ishte ëndërr ende e dëshiruar për kohën!

Në tre dekadat e fundit, kemi patur sondazhe më shumë të rrejshme se reale natyrash të ndryshme, në veçanti për “fitoret” dhe “debaklet” e partive politike në vend, por nuk kemi patur sondazhe të kësaj natyre, apo të çfarëdo tjetër për të cilat është nevojë për shtetin më të ri në Ballkanin Perëndimor.

Për ata që nuk e dinë, dua të risjell në kujtesë se dekada e viteve ’80-të të shekullit të kaluar, ishte dekada më iluministe jo vetëm tek studentët e Universitetit të Prishtinës. Çdo vit në Panairin e Librit në Prishtinë, qindra punonjës gjithandej Kosovës, nuk hamendësoheshin të blinin libra edhe përmes kredisë, e cila mundësohej atëbotë. Dyshoj se këta punonjës ishin pasionantë të leximit të librave, por e di saktë se ata blinin shumë libra dhe derisa librat sigurojnë “strehë” në një shtëpi, vjen momenti e lexohen!

Unë ende i besoj “sondazhit” të bindjes sime se mungon një libër për kokë banori dhe ende besoj se leximi i librave është pakësuar edhe më ndjeshëm në Kosovë.

Derisa mungon një libër për kokë banori, atëherë kemi të bëjmë me një shoqëri ndjeshëm të paarsimuar, më saktë me një shoqëri që ka zgjedhur kaosin në vend të normalitetit. Kemi të bëjmë me një shoqëri që nuk ka kritere vlerësimi për asgjë dhe krejt në fund kemi të bëjmë me një shoqëri të zhytur në kaosin e errët dhe pa vizione për të ardhmen e saj.

Institucionet e Kosovës duhet të shqetësohen jo vetëm për këtë fakt, por edhe për shumë çështje tjera. Të fitosh pushtet përmes mbindërtimit të gënjeshtrave dhe situatave irreale është lehtë në mesin e një shoqërie, të cilës ende i mungon një libër për kokë banori, por të ndërtosh dhe të udhëheqësh shtetin përmes ideve, projekteve dhe vlerave pavarësisht në cilin segment, është vlerë dhe fisnikëri.

Këtij shteti dhe këtij populli i mungon fisnikëria si asnjëherë më parë, pasi vuan nga superioriteti i injorantëve e mujsharëve, të cilët moti janë ngjitur në piramidën e tij dhe e kanë ngulfatur në zverk.