Deklarata e Haxhiut për dorëheqjet, reagon Prokuroria Themelore në Prishtinë

Prokuroria Themelore në Prishtinë ka reagon sot lidhur me deklaratën e ministres së Drejtësisë, Albulena Haxhiu e cila ka kërkuar shkarkime dhe dorëheqje të personave brenda këtij institucioni të cilët nuk vepruan në kohë dhe sipas përgjegjësisë në rastin e 11 vjeçares.

Prokuroria Themelore në Prishtinë thotë se janë të pabaza dhe të papranueshme deklarata të tilla publike.

“Prokuroria Themelore në Prishtinë siguron edhe njëherë opinionin publik se trajtimi i rastit të 11 vjeçares nga ana e Prokurorit të Shtetit është bërë konform të gjitha dispozitave ligjore të cilat janë ndërmarrë në kohë dhe në mënyrë profesionale, në koordinim me institucionet e tjera relevante, andaj, për ne janë të pabaza dhe të papranueshme deklarata të tilla publike”, thuhet në reagim.

Lexo po ashtu Rasti i 11 vjeçares, Haxhiu: Më e pakta që do të duhej të ndodhte është dorëheqja e kryeprokurorit në Prishtinë dhe prokurorit të rastit

“Në vazhdën e kërkesave të kësaj prokurorie drejtuar organeve ekzekutive ka qenë kërkesë esenciale angazhimi i një psikologu pranë kësaj prokurorie, në trajtimin e çështjeve penale, sidomos atyre për të mitur, e cila kërkesë nuk është aprovuar asnjëherë me arsyetimin se nuk ka mjete buxhetore për ta mbuluar të njëjtën kërkesë, derisa e theksojmë se Prokurori i Shtetit ka vazhduar të trajtojë raste të tilla penale dhe do të mbetet i përkushtuar për përmbushjen e obligimeve kushtetuese dhe ligjore lidhur me këtë rast dhe të gjitha rastet e tjera të cilat i ka në trajtim, gjithmonë duke e ruajtur ndarjen e pushteteve dhe pavarësinë institucionale”, thuhet ndër të tjera në reagimin e Prokurorisë. /Telegrafi/