MPJ e Malit të Zi: Helikopteri me patriarkun serb Porfirije nuk ka kërkuar leje për të hyrë në vendin tonë

Ministria e Punëve të Jashtme e Malit të Zi ka bërë të ditur se helikopteri i MPB-së së Serbisë, i cili me patriarkun serb Porfirije ka hyrë në Mal të Zi më 3 gusht për të nënshkruar një marrëveshje, nuk ka kërkuar leje për të hyrë në këtë vend.

“Ju informojmë se me datën 3 gusht, si dhe pesë ditë pune para kësaj date, kjo Ministri nuk ka pranuar kërkesë për miratimin e fluturimit përmes hapësirës ajrore dhe uljen në territorin e Malit të Zi të helikopterit të Ministrisë së Brendshme të Republikës së Serbisë nga Ambasada e Republikës së Serbisë në Podgoricë”, ka deklaruar sekretari shtetëror Ljubomir Mishuroviq, përcjell Telegrafi.

Lexo po ashtu Jep dorëheqjen kreu i policisë kufitare, pas hyrjes “pa u kontrolluar” të patriarkut serb Porfirije në Mal të Zi

Sipas mediave në Mal të Zi, ai këtë e tha në përgjigje ku është kërkuar informacion nëse fluturimi me helikopter i Ministrisë së Punëve të Brendshme të Serbisë ishte njoftuar përmes kanaleve diplomatike tek autoritetet shtetërore të Malit të Zi dhe nëse MPJ e ka aprovuar atë fluturim.

Ndryshe, edhe nga “adresa” të tjera është pretenduar se helikopteri i MPB-së së Serbisë ka zbritur pa leje në terrenin stërvitor të kampit policor në Zllaticë.

Lexo po ashtu Qeveria e Malit të Zi nënshkruan marrëveshjen me Kishën Ortodokse Serbe, partia e Gjukanoviqit nis iniciativën për mocion mosbesimi

Madje, për një arsye të tillë, kreu i policisë kufitare, Vasko Akoviq, kishte dhënë dorëheqjen nga ajo detyrë.

Policia, nga ana tjetër, pretendon se delegacioni i Kishës Ortodokse Serbe, i udhëhequr nga Patriarku Porfirije, ka hyrë në Mal të Zi në përputhje me dispozitat e Ligjit për kontrollin kufitar. /Telegrafi/