Të paktën 30 të vdekur pasi autobusi ra nga “ura famëkeqe” në Kenia

Të paktën 30 persona kanë humbur jetën pasi një autobus u rrëzua nga një urë në Kenia.

Sipas mediave të huaja, përcjell Telegrafi, autobusi ra nga ura Nithi dhe në një lumë në qytetin Meru, në autostradën kryesore nga kryeqyteti, Nairobi.

Një zyrtar i lartë i policisë ka thënë se autobusi “duhet të ketë pasur një dështim të frenave sepse ishte me një shpejtësi shumë të madhe” kur pësoi aksidentin.

Duke folur për gazetën “Daily Nation” për aksidentin “e tmerrshëm”, komisioneri i qarkut Nobert Komora e përshkroi urën si “famëkeqe”.

Pamjet nga pasojat tregojnë autobusin në breg të lumit, në një gjendje të prishur, dhe punonjësit e shpëtimit që vëzhgojnë vendin e ngjarjes.

Një punonjës i shpëtimit tha se numri i të vdekurve ka të ngjarë të vazhdojë të rritet, me disa njerëz ende në spital.

Aksidenti ndodhi rreth orës 18:30 të së dielës dhe zyrtarët e Kryqit të Kuq thanë se një operacion shpëtimi u pezullua pas rënies së natës.

Aksidenti është i fundit në një seri aksidentesh vdekjeprurëse në Kenia, ku rrugët janë të ngushta dhe policia fajëson drejtuesit për shpejtësinë. /Telegrafi/