Me raketat amerikane HIMARS, Ukraina godet urën kyçe përmes së cilës bëhet furnizimi i trupave ruse ‘në territorin e pushtuar’

Forcat ukrainase kanë goditur dhe dëmtuar rëndë një urë që është kyçe për furnizimin e trupave ruse në Ukrainën jugore, ka thënë një zyrtar rajonal të mërkurën.

Sipas AP, përcjell Telegrafi, Kirill Stremousov, nënkryetari i administratës së përkohshme të mbështetur nga Moska për rajonin jugor të Khersonit të kontrolluar nga Rusia, tha se ushtria ukrainase goditi të mërkurën urën Antonivskyi, e cila kalon lumin Dnipro, me raketa, duke shënuar 11 goditje.

Ai tha në komentet e transmetuara nga agjencia e lajmeve Interfax se ura pësoi dëmtime serioze, por nuk ishte e mbyllur për trafik.

“Ura është në gjendje të keqe tani”, citohet të ketë thënë Stremousov, sipas Interfax. “Ura nuk ishte e mbyllur, trafiku nëpër të po vazhdon ende, por situata është serioze”.

Sipas AP, përcjell Telegrafi, ura 1.4 kilometra është kalimi kryesor përtej lumit Dnieper në rajonin Kherson, dhe nëse bëhet e papërdorshme, do të ishte e vështirë për ushtrinë ruse të vazhdojë të furnizojë forcat e saj në rajon mes sulmeve të përsëritura ukrainase.

More videos from the bridge- pic.twitter.com/HFZkHV3hAB

— Special Kherson Cat 🐈🇺🇦 (@bayraktar_1love) July 20, 2022

Stremousov tha se forcat ukrainase përdorën raketat e shumta HIMARS të furnizuara nga SHBA për të goditur urën, duke shtuar se disa prej tyre “u kapën” nga mbrojtja ajrore ruse.

Ndërkohë kreu i administratës së Khersonit të emëruar nga Moska, Vladimir Saldo, ka theksuar se automjetet e pasagjerëve u lejuan të vazhdonin të lëviznin nëpër urë, por trafiku i kamionëve u ndal për të lejuar riparime të shpejta.

Ai vuri në dukje se kamionët mund të kalonin lumin duke përdorur një digë rreth 80 kilometra (50 milje) larg.

Siç bëhet e ditur më tej, granatimet e urës të mërkurën ishin të dytat në dy ditë. Ajo u dëmtua lehtë nga bombardimet ukrainase një ditë më parë, sipas autoriteteve të mbështetura nga Moska në Kherson.

📽️Ukrainian forces targeted Antonovskiy Bridge near #Kherson. #UkraineRussiaWar pic.twitter.com/OUtAOw9CQw

— MilitaryLand.net (@Militarylandnet) July 19, 2022

Ndryshe, në fillim të agresionit, trupat ruse pushtuan shpejt rajonin Kherson në veri të Gadishullit të Krimesë që Rusia aneksoi në vitin 2014.

Ata janë përballur me kundërsulme ukrainase, por kryesisht kanë mbajtur pozicionin e tyre.

Lidhur me goditjet mbi urë ka pasur edhe një deklaratë nga Ministria britanike e Mbrojtjes.

“Është një nga dy pikat e vetme të kalimit rrugor mbi Dnieper me anë të së cilës Rusia mund të furnizojë ose të tërheqë forcat e saj në territorin që ka pushtuar në perëndim të lumit. Kontrolli i vendkalimeve në Dnieper ka të ngjarë të bëhet një faktor kyç në rezultatin e luftimeve në rajon”.

Sulmet ukrainase në urën në Kherson vijnë pasi pjesa më e madhe e forcave ruse kanë ngecur në luftimet në zemrën industriale lindore të Ukrainës, Donbas, ku ata kanë bërë fitime të ngadalta duke u përballur me rezistencën e ashpër të Ukrainës. /Telegrafi/