Ministrja Rizvanolli para Komisionit hetimor nënshkruan betimin se do ta thotë të vërtetën: Qëllim sigurimi i energjisë elektrike

Ministrja e Ekonomisë, Artane Rizvanolli, është duke u intervistuar para Komisionit hetimor për krizën energjetike.

Ministrja Rizvanolli para raportimit nënshkroi betimin se do ta thotë të vërtetën, ndërkaq para deputetëve paraqiti pozicionin e ekzekutivit për krizën energjetike, e cila sipas saj po vazhdon ende.

Ministrja Rizvanolli tha se në tetor të vitit të kaluar janë bërë skenarët për përballimin e kësaj krize.

Ajo përmendi edhe ndarjet buxhetore për subvencionim të energjisë, mirëpo tha se rënia e një blloku në KEK i ka prishur gjitha skenarët dhe parashikimet.

Rizvanolli tha se kanë punuar për bashkëpunim me Shqipërinë dhe Maqedoninë e Veriut për tejkalim të krizës energjetike, mirëpo për shkak të krizës edhe në këto dy shtete nuk ka qenë e mundur.

Madje, tha se kanë diskutuar me Maqedoninë e Veriut për shkëmbim të thëngjillit me energji elektrike, raporton Kp.

Ajo nënvizoi edhe qëllimin kryesor të Ministrisë së Ekonomisë në krizën energjetike. “Siguria e furnizimit me energji elektrike dhe përmballueshmëria e çmimeve të energjisë për qytetarët”, tha ajo.

Komisioni po vazhdon punimet me pyetjet e deputetëve.