Tre shqiptarë përdhunuan në grup një grua në Angli – dënohen me 57 vjet burg

Tre burra shqiptarë që përdhunuan në grup një grua të re në Bedford të Anglisë janë dënuar me 57 vjet burg.

Siç raporton DailyMail, përcjell Telegrafi, viktima 23-vjeçare po shijonte natën e saj të parë jashtë pas përfundimit të masave kufizuese nga COVID-19, kur u nda nga shoqja e saj.

Ajo e gjeti veten të vetme dhe të pambrojtur pasi u largua nga klubi i natës Vogue në Bedford High Street në orët e para të së shtunës, 4 shtator të vitit të kaluar.

Pa e ditur, ajo ishte përndjekur brenda klubit nga Gemti Hyka, 31-vjeçar, i cili e futi në makinën e tij dhe e çoi në një adresë në qendër të qytetit ku e përdhunoi.

Dy nga bashkëpunëtorët e tij, Vullnet Haka, 33-vjeçar dhe Ibrahim Bezati, 36-vjeçar, mbërritën aty dhe e përdhunuan. Gjatë kësaj situate, gruaja u godit me shuplakë në fytyrë dhe u detyrua të merrte kokainë.

Duke dënuar të tre burrat në Gjykatën e Luton Crown, gjykatësi Steven Evans, tha se ata i kishin shkaktuar viktimës së tyre “makthin më të keq të çdo gruaje”, duke shtuar se ata “e kishin trajtuar atë sikur të ishte më pak se njeri”.

Gruaja ka arritur të arratiset nga shtëpia në mëngjes dhe është gjetur në gjendje të shqetësuar nga kalimtarët.

Duke dhënë dëshmi në Gjykatën e Luton Crown, ajo tha se nuk kujtonte se ishte larguar nga klubi në orët e para të 4 shtatorit të vitit të kaluar.

“U luta që të më linin të shkoja. Isha e hutuar dhe e frikësuar”, i tha ajo prokurorit Martin Mulgrew.

Hyka, nga Bedford, u dënua me 26 vjet burg pasi u shpall fajtor për rrëmbim, burgim të rremë dhe dy akuza për përdhunim.

Haka 33-vjeçar dhe Bezati, 36 vjeç, të dy nga Bedford, u shpallën fajtorë për burgim të rremë si dhe për dy akuza për përdhunim të gruas. Haka u dënua me 14 vjet burg, ndërsa Bezati u dënua me 17 vjet burg.

Shoqja e viktimës i tha gjykatës se kur ato u larguan nga klubi ajo shkoi djathtas dhe viktima doli majtas për të shmangur një përleshje të një grupi burrash në rrugë.

Shoqja, gjithashtu 23 vjeçe, shpenzoi gjysmë ore duke e kërkuar vetë dhe më pas iu bashkua këtij kërkimi edhe një shok. /Telegrafi/