Japonia “ndjek me vëmendje” lëvizjet e tetë anijeve luftarake ruse dhe kineze pranë territorit të saj

Të paktën tetë anije luftarake ruse dhe kineze janë parë në detet pranë Japonisë këtë javë, një tjetër shenjë e presionit të dukshëm që të dy partnerët kanë bërë mbi Tokion pas përkeqësimit të marrëdhënieve mbi Ukrainën dhe Tajvanin.

Sipas mediave të huaja, përcjell Telegrafi, Ministria e Mbrojtjes e Japonisë tha të martën se forcat e saj kishin vëzhguar pesë anije luftarake ruse të udhëhequra nga një shkatërrues anti-nëndetëse që kalonin përmes ngushticës Tsushima, e cila ndan Japoninë dhe Korenë e Jugut.

Siç bëhet e ditur më tej, flota ruse me pesë anije ka qenë pranë ishujve japonezë për një javë, nga Hokkaido në veri në Okinawa në jug, tha ministria në një njoftim për shtyp.

Ndërkohë, të paktën dy anije luftarake kineze dhe një anije furnizimi u panë të martën në ishujt Izu, rreth 500 kilometra (310 milje) në jug të kryeqytetit Tokio.

Një nga ato anije dukej të ishte Lhasa, një shkatërrues i raketave dhe një nga anijet më të fuqishme të Kinës.

Ministria tha se grupi ka operuar në ujërat pranë Japonisë që nga 12 qershori.

“Kjo është një shfaqje e dukshme e forcës nga Rusia dhe Kina”, ka vlerësuar James Brown, profesor i asociuar i shkencave politike në Universitetin Temple në Tokio. /Telegrafi/