Transportonte me autobus 57 emigrantë, arrestohet një person në Obiliq

Një person është arrestuar pasi po transportonte me autobus 57 emigrantë të mërkurën rreth orës 22:00 në fshatin Milloshevë të Obiliqit.

Sipas njoftimit, autobusi me emigrantë është ndaluar për kontrollim nga zyrtarët policorë të Njësisë së Trafikut Regjional të Prishtinës në fshatin Milloshevë të Obiliqit.

Tutje thuhet se autobusi me targa vendore dhe me drejtues S.U, kishte në 57 shtetas të huaj (48 nga Siria, pesë nga Egjipti, dy nga Iraku, një nga Palestina dhe një nga Bangladeshi).

Ndërkaq, dyshohet se shtetasit e huaj kishin ardhur përmes rrugëve ilegale nga Turqia dhe synim të mbërritjes kishin shtetet e perëndimit.

“Në fshatin Milloshevë të Obiliqit, më 01.06.2022 rreth orës 22:00, është ndaluar për kontrollim nga zyrtarët policorë të Njësisë së Trafikut Regjional të Prishtinës një autobus.  Autobusi me targa vendore dhe me drejtues S.U., (viti i lindjes 1988, mashkull kosovar), kishte në bord 57 shtetas të huaj (48 nga Siria, pesë nga Egjipti, dy nga Iraku, një nga Palestina dhe një nga Bangladeshi). Dyshohet se shtetasit e huaj kishin ardhur përmes rrugëve ilegale nga Turqia dhe synim të mbërritjes kishin shtetet e perëndimit. Rasti, emigrantët janë trajtuar nga zyrtarë policorë nga Drejtoria për Migrim dhe të Huaj dhe të njëjtit janë dërguar në Qendrën e Azilit në Magure”, thuhet në njoftim.

Siç thuhet në njoftim, për rastin është njoftuar prokurori kujdestar dhe në koordinim me të ndaj drejtuesit të autobusit është iniciuar rasti ‘kontrabanda me emigrantë’.

“I dyshuari është intervistuar në prani të avokatit mbrojtës dhe më pas me aktvendim nga prokurori i njëjti dërgohet në mbajtje për 48 orë”, thuhet në njoftimin e Policisë së Kosovës. /Telegrafi/