Vajza e modeles Kate Moss mbante pompat e insulinës për diabet në “Met Gala 2022”

Lila Moss zbuloi pompën e insulinës dhe monitorin që mbante për të kontrolluar diabetin e saj të tipit 1, ndërsa merrte pjesë në “Met Gala” në New York të hënën në mbrëmje.

Duke mbërritur së bashku me nënën e saj, modelen Kate Moss, 19-vjeçarja bëri paraqitjen në tapetin e kuq me një fustan ngjyrë bezhë të markës ‘Burberry’, të zbukuruar me shkronja dhe numra dhe të mbështjellë me diamante.

Detajet e qarta të veshjes tërhoqën vëmendjen te pjesa e insulinës në kofshën e saj të majtë dhe pajisja e monitorimit të vazhdueshëm të glukozës në gjak në krahun e sipërm të djathtë të saj, shkruan Daily Mail, transmeton Telegrafi.

Modelja kishte folur më parë për gjendjen e saj në një video në YouTube, teksa tha se kishte marrë vendim që t’i merrte me vete nëpër pasarela.

“Kam disa tableta sheqeri, në rast se sheqeri im në gjak ulet. Unë jam me diabet kështu që e kam këtë që më kontrollon në këmbën time, e cila më jep insulinë”, tha ajo.

“Kjo është shumë e rëndësishme për ta mbajtur në çantë, vjen me mua kudo”.

Lila, vajza e Kate dhe ish-partnerit të saj, Jefferson Hack, zbuloi se ka një AirTag Apple të bashkangjitur në lexuesin e saj të pompës së insulinës në mënyrë që të mos e humbasë.

Pompa e insulinës së Lilas ishte e dukshme teksa ecte në pistë me rroba banje në eventin special të ‘Versace’ gjatë Javës së Modës në Milano në fillim të këtij viti.

“Mendoj se jo shumë njerëz e dinë që unë kam diabet. Nuk është e dukshme nga jashtë, kështu që askush nuk do ta dinte vërtet vetëm duke ju shikuar”.

Diabeti i tipit 1 bën që niveli i glukozës (sheqerit) në gjakun tuaj të rritet shumë.

Ndodh kur trupi juaj nuk mund të prodhojë mjaftueshëm një hormon të quajtur insulinë, i cili kontrollon glukozën në gjak.

Ju keni nevojë për injeksione të përditshme të insulinës për të mbajtur nën kontroll nivelet e glukozës në gjak. /Telegrafi/