Arrestohen dy shtetas të huaj për kultivim dhe mirëmbajtje të drogave në Prishtinë

Policia e Kosovës ka arrestuar dje dy persona shtetas të huaj, nën dyshimin se ishin të përfshirë si ekspert të kultivimit dhe mirëmbajtje së substancave narkotike në një laborator droge i cili ishte zbuluar dhe shkatërruar nga Policia e Kosovës në muajin dhjetor të vitit të kaluar në një fshat të Prishtinës.

Lajmin për Telegrafin e ka konfirmuar zëdhënësi i policisë, Daut Hoxha.

“Ju konfirmoj se në kuadër të angazhimeve policore në luftën kundër parandalimit dhe luftimit të abuzimit, kultivimit apo trafikimit me droga, dje me datë 29.04.2022, antidroga e Policisë së Kosovës në bashkëpunim me Policinë Kufitare të Kosovës kanë identifikuar dhe arrestuar dy persona të dyshuar meshkuj shtetas të huaj, të cilët ndodheshin në kërkim policor nën dyshimin se ishin të përfshirë si ekspert të kultivimit dhe mirëmbajtje së substancave narkotike në një laborator droge i cili ishte zbuluar dhe shkatërruar nga Policia e Kosovës në muajin dhjetor te vitit të kaluar (2021) në një fshat të Prishtinës”, ka thënë Hoxha.

Hoxha shtoi se me vendim te prokurorit të dyshuarit janë dërguar në mbajtje si dhe është njoftuar zyra ndërlidhëse për bashkëpunim ndërkombëtar e Policisë së Kosovës. /Telegrafi/