“Vera Andrron Detin” fiton çmimin për ‘filmin më të mirë’ në goEast Film Festival

Filmi kosovar “Vera Andrron Detin” me regji të Kaltrina Krasniqit ka shënuar një tjetër arritje për kinematografinë e vendin tonë.

Ky film, i cili ka për bazë një grua në mezomoshë që punon si interprete e gjuhës së shenjave, fitoi çmimin për ‘filmin më të mirë’ në “goEast Film Festival”.

Lajmi është bërë i ditur në një shkrim shpërndarë në Facebook nga Ministria e Kulturës, Rinisë dhe Sportit.

“Vera Dreams of the Sea fiton çmimin për filmin më të mirë në goEast Film Festival. Edhe një sukses i jashtëzakonshëm për filmin me regji nga Kaltrina Krasniqi dhe kinematografinë e vendit tonë”, thuhet në shkrimin e tyre.

Lexo po ashtu “Vera Andrron Detin” i Kaltrina Krasniqit fiton grantin kryesor në Festivalin e Filmit ‘Arras’

“Shumë urime gjithë ekipit dhe suksese të mëtutjeshme”, vazhdon më tej postimi.

Në një intervistë dhënë për Telegrafin më parë, regjisorja Krasniqi ka zbuluar disa nga veçoritë që mban ky film.

“Vera andrron detin” është një film për një grua në mezomoshë e cila punon si interprete e gjuhës së shenjave. Pas vetëvrasjes së papritur të burrit të saj ajo ballafaqohet me një valë peripecish për pronën e tyre familjare. Rrugëtimi i saj, shpalosë një ambient shoqëror dhe kulturor i cili historikisht ka qenë i pabarabartë në raport me gratë. Për mua, mosha e kryepersonazhes ka qenë aspekti më relevant, sepse ky brez bartë ne vete një histori të tërë trazirash të kësaj pjese të botës të cilat suksesshëm kanë injoruar perspektivën e grave”, kishte thënë ajo.

Projekti në fjalë kishte fituar edhe grantin kryesor në Festivalin e Filmit ‘Arras’ si dhe çmimin kryesor në Festivalin Ndërkombëtar të Filmit në Tokio. /Telegrafi/