Von Cramon: Nuk ka datë të saktë kur mund të përfundojë dialogu

Eurodeputetja dhe raportuesja për Kosovën në Parlamentin Evropian, Viola von Cramon, e ka vlerësuar situatën e përgjithshme të sigurisë në vend të qetë.

Ajo, gjatë një konference me gazetarë sot në Mitrovicë, tha se nuk ka ndonjë paralele të ngjashme në mes të situatës në Kosovë dhe asaj që po mbretëron aktualisht në botë, ndërsa ka bërë thirrje që secili të kontribuojë për qetësimin e situatës këtu.

“Është përgjegjësi e përbashkët që të sigurojmë që gjendja të mbetet e qetë. Nuk shohim asnjë tregues të ndonjë provokimi nga asnjëra anë. Kisha dashur që t’i marr këto fakte parasysh dhe nuk kisha dashur të ketë insinuata që kjo gjendje të jetë më e përkeqësuar ose të kemi ndonjë lloj dhune. Do të thotë faktet se nuk ka provokime dhe tensione, na bëjnë që të punojmë të gjithë së bashku dhe mos ta keqpërdorim çfarëdo lloj fjale edhe nëse janë brutale, do të thotë nuk shohim ndonjë paralele të situatës në mes të gjendjes këtu dhe në botë”, ka thënë von Cramon.

Në lidhje me liberalizimin e vizave dhe integrimin në BE, ajo theksoi se gjithçka varet nga dialogu Kosovë-Serbi. Sipas saj, në Bruksel ka interes të jashtëzakonshëm për rezultat, pasi do t’i hapte rrugën Kosovës për integrim evropian, teksa nuk ka precizuar ndonjë datë kur mund të përfundojë dialogu.

“Çfarëdo marrëveshje sa më parë që të jetë e mundur, me njohje të përbashkët, do ta hapte derën për integrime evropiane. Mendoj se kjo është më e rëndësishmja në këtë moment. Nuk mund të flas për Prishtinën dhe as për Beogradin, por e di që në Bruksel ka interes të jashtëzakonshëm për të parë rezultate sa më parë që është e mundur. Kur flasim do të thotë për negociata teknike apo bisedime, ka pasur një lloj përparimi, por a jemi të gatshëm në këtë pikë apo do ta shpallte dikush ndonjë datë, unë nuk besoj që dikush mundet”, potencoi von Cramon.

Eurodeputetja ka përsëritur faktin se janë në përpjekje të arritjes të rezultateve të theksuara sa i përket dialogut, në mënyrë që Kosova të ecën përpara.

“Nëse kemi progres në kuptimin e dialogut, hapat tjerë për çfarëdo integrimi evropian që mund t’i jepet Kosovës, mirëpo deri tani jemi duke u munduar për disa rezultate të theksuara dhe produktive sa i përket dialogut, para se të kalojmë në hapat tjerë”, tha ajo.

Cramon foli edhe rreth ngecjes së procesit të hapjes së urës kryesore në Mitrovicë, duke thënë se ju takon të dyja palëve që sa më parë të gjejnë një zgjidhje të përbashkët.

Ndryshe, von Cramon gjatë qëndrimit në të dyja pjesët e qytetit të Mitrovicës, ka takuar kryetarin Bedri Hamza dhe përfaqësues të shoqërisë civile, por jo edhe përfaqësues të pushtetit lokal të Mitrovicës Veriore, të cilët refuzuan një takim të tillë. /Kp/