Haliti: Kosova është shteti më i sigurt në Ballkan

Deputeti i PDK-së, Xhavit Haliti, thotë se Kosova është shteti më i sigurt i Ballkanit.

Haliti tha se, sipas Rezolutës 1244, NATO e ka për obligim ta mbrojë vendin.

“Trupat e NATO-s janë rreth e përqark Kosovës gjithkund, ne e kemi Maqedoninë në NATO. E kemi Shqipërinë në NATO. E  kemi Malin e Zi në NATO, dhe e kemi Italinë, por mbi të gjitha është Amerika gjithkund e pozicionuar. Janë disa çështje me të cilat nesër mund të përballet krejt bota. Në qoftë se çmendet krejt Putini, ai mund të ndezë luftën e tretë botërore, e cila do te jetë luftë pa fitues, sepse rreziku është i madh i përdorimit të armeve bërthamore të cilat këta kanë pasur nja marrëveshje në vitin 80 për pakësimin e tyre dhe i kanë pakësuar deri në 90 për qind, por edhe këto që i kanë janë shumë” tha Haliti në Klan Kosova.

Duke folur për “Fondin e Sigurisë”, Haliti u shpreh skeptik që ky fond mund të jetë i suksesshëm, ndërsa propozoi dy mënyra tjera për forcimin e institucioneve të sigurisë në vend.

“Unë kam një mendim timin, ne kemi dy mundësi; të krijohet një fond i besueshëm dhe i kontrolluar shumë për diasporën e cila do të kontribuojë, por brenda Kosovës unë mendoj që shteti duhet të vendosë taksa për të krijuar fond të veçantë. Unë nuk besoj që një fond i tillë mund të jetë i suksesshëm edhe nuk e besoj që mund të ketë përkrahje nga këto mekanizmat ndërkombëtare që i kemi këtu”, tha Haliti.