Gresa Bakraqi thyen dy rekorde të Kosovës në atletikë, në 800 dhe 1500 metra

Atletja më e mirë në vend për vitin 2021, Gresa Bakraqi po vazhdon me suksese dhe një gjë të tillë e ka arritur edhe këtë javë, ku ka thyer dy rekorde të Kosovë.

Gresa është duke qëndruar në fazën e dytë të përgatitjeve, por njëkohësisht po merr pjesë edhe në dy mitingje ndërkombëtare në Zagreb të Kroacisë.

Ajo javën që lamë pas garoi në disiplinën 800 metra, ku arriti ta zërë vendin e tretë, por theu rekordin për Kosovë për kohën e saj të arritur me 2:09:53.

Gresa ka garuar edhe sot në disiplinën 1500 metra ku arriti të plasohet në vendin e parë dhe po ashtu ta thyej edhe rekordin për Kosovë. Ajo shtegun e përshkroi për 4;28;47.

Sipas trajnerit Adnan Demalia, që punon me Gresën tash e gjashtë vite, këto janë arritje shumë të mira, pasi që synimi i Gresës janë Lojërat Olimpike që mbahen në Paris në vitin 2024.

“Janë rezultatet shumë të mira. Dy rekorde të thyera brenda një jave. Gresa po ecën shumë mirë me punë. Synimi është që të arrijë të paraqitet në Lojërat Olimpike në Paris”, ka thënë Demalia për Telegrafin.

Gresa Bakraqi do të ketë edhe dy paraqitet të tjera brenda këtij muaji, fillimisht në Split, ndërsa pastaj në Lojërat Ballkanike në Turqi në muajin mars. /Telegrafi/