Kush është krijuesi i posterave të filmave kosovarë që pushtuan botën?

Posterat në film apo në një projekt tjetër luajnë rol të rëndësishëm duke pasqyruar një pjesë të asaj që shikuesit mund të shohin më vonë, apo kuptojnë pas përfundimit të tij.

Megjithatë, në shumë prej tyre perceptohet ajo që me të vërtetë mban ‘gjallë’ apo në vëmendje admiruesit e një projekti, si një shtysë për t’i bërë kureshtarë që domosdoshmërisht duhet parë apo shikuar përtej kopertinës.

Kjo gjë ka ndodhur edhe me dy prej filmave më të suksesshëm kosovarë që tanimë kanë pushtuar tregun ndërkombëtar me arritjet e tyre të jashtëzakonshme.

“Zgjoi” dhe “Pa Vend” lirshëm mund të thuhet se janë dy nga projektet më të mëdha të kinematografisë kosovare, që me punën e përkushtimin e tyre kanë qenë një zë i madh për vendin për më shumë se një vit.

Por, kush është krijuesi i posterave të këtyre dy filmave që fituan çmime të mëdha?

Albian Gagica, siç ka treguar në një intervistë të shkurtër për Telegrafin me profesion është dizajner. I lindur dhe rritur në Prishtinë, shkollimin për dizajn grafik e ka kryer në Amerikë ku edhe ka ardhur si student në shkollën e mesme në vitin 1996.

Për Telegrafin, ai thotë se pas studimeve është kthyer në Prishtinë dhe ka qenë pjesë e ekipit të parë punues në Kohavision.

“Kam bashkë themeluar INIT productions bashkë me partnerin tim Alush Gashin dhe kam punuar 15 vjet në projekte e kampanja të ndryshme. Në 2015 jam kthyer në Amerikë bashkë me familjen e ngushtë, ku vazhdoj të jetoj e punoj”, u shpreh ai.

Artisti i njohur shton se është shumë krenar për suksesin e këtyre filmave që kanë korrur suksese të mëdha jashtë trojeve shqiptare.

“Shumë krenar dhe më gëzon suksesi i tyre sepse që të dy këta filma janë prodhim i Kosovës nga filmbërës të talentuar”, tha ai.

Tutje, Gagica thekson se me regjisorin e filmit “Pa Vend”, Samir Karahodën, njihet që 20 vite dhe se kanë bashkëpunuar edhe më parë.

Lexo po ashtu Të enjten nis votimi për “Oscars 2022”, Dua Lipa tregon mbështetjen për filmin “Zgjoi”

“Për posterin e filmit “Pa vend” më ka kontaktuar Samiri me të cilin njihemi qe 20 vjet dhe kemi punuar bashkë edhe më herët. Ndërsa, për “Zgjoi-n” më ka kontaktuar producenti Yll Uka”, u shpreh ai.

Sipas Albianit, posteri e krijon vetëm një vizion dhe iluzion rreth asaj që bëhet fjalë në një projekt filmik.

“Posteri e krijon një vizion ose iluzion për çka bëhet fjalë, ose edhe e rritë kureshtjen, mirëpo kualitetin e filmave e bëjnë vet filmat, skenari i mirë, fotografia e mënyra si janë xhiruar, regjia e aktrimi, montazhi, muzika, postproduksioni. Secili detaj luan rol”, vazhdon tutje ai.

Për gjithë sukseset e filmave, Gagica thotë se ka qenë i bindur marrë parasysh regjisorët dhe ekipet me të cilët kanë punuar.

“Duke i njohur të dy regjisorët dhe ekipet me të cilët ata kanë punuar e kam ditur që do të kenë sukses sepse shumë talent e punë kur bëhen bashkë, rezultati duhet të jetë i mirë”, ka thënë ai për Telegrafin.

I njëjti në Prishtinë operon me kompani të tijën dhe vazhdon të ketë partnerë të shumtë në rrugëtimin dhe punën si dizajner.

Për t’ua rikujtuar publikut, këtë javë saktësisht të enjten ka nisur procesi i votimit të anëtarëve të jurisë për çmimin e Akademisë së Filmit, “Oscars 2022”, ndërsa Kosova për herë të parë është në listën e ngushtë si pretendent për t’u nominuar në kategorinë “Filmi më i mirë ndërkombëtar” me filmin “Zgjoi”.

Kurse në anën tjetër filmi “Pa Vend” ka triumfuar në “Sundance Film Festival 2022” duke fituar çmimin ‘filmi më i mirë i shkurtër’.

/Telegrafi/