Mbi 77 mijë persona janë vaksinuar me dozën e tretë kundër COVID-19 në Kosovë

Ministria e Shëndetësisë në Kosovë ka njoftuar këtë të diel se janë regjistruar 2,390 raste të reja me coronavirus.

Autoritetet shëndetësore kanë njoftuar edhe se 1.291 persona janë shëruar derisa 35,051 persona janë ende aktivë me COVID-19.

Bazuar në të dhënat zyrtare të MSH-së, deri me tani  janë dhënë mbi 1.7 milion doza të vaksinës.

Me dy doza të vaksinës janë imunizuar 804,801 persona apo 44 për qind e popullsisë.

Ndërkaq, 77 mijë e 437 persona janë imunizuar deri tani me dozën e tretë të vaksinës kundër virusit.

Qytetarët në Kosovë mund të marrin vaksina të kompanive: Pfizer/BioNTech dhe AstraZeneca.

Qeveria e Kosovës ka miratuar më 21 janar masa të reja për luftim të pandemisë.

Sipas vendimit të Qeverisë, qytetarët që hyjnë në Kosovë duhet të jenë të vaksinuar plotësisht dhe të kenë edhe dozën përforcuese.

Ata që nuk kanë dozën përforcuese, duhet të kenë test negativ të llojit PCR, të vlefshëm për 48 orë.

Kufizimi i qarkullimit do të aplikohet nga ora 22:00 deri në orën 05:00.

Bizneset e gastronomisë mund të zhvillojnë aktivitetin e tyre nga ora 05:00 deri më 21:00, njofton Telegrafi.