Kanye Westit do t’i ndalohet hyrja në Australi nëse nuk vaksinohet plotësisht, ashtu siç ndodhi me Novak Djokovicin

Kanye Westit i është thënë se do të ndalohet të hyjë në Australi për shkak të statusit të tij të vaksinimit, nëse ai përpiqet të mbaj turneun e tij vitin e ardhshëm.

Reperi amerikan, 44 vjeç, dëshiron të performojë disa shfaqje në stadium për të promovuar albumin e tij “Donda” në Australi gjatë marsit, raportoi News.com.au – por besohet se artisti fitues i 21 çmimeve Grammy ka marrë vetëm një dozë të vaksinës COVID-19.

Sipas ligjit australian, kushdo që hyn në vend duhet të jetë plotësisht i vaksinuar kundër virusit.

Kjo vjen pasi asi i pavaksinuar i tenisit,  Novak Djokovic u deportua nga Melburni në prag të Australian Open dy javë më parë, pas një beteje ligjore 11-ditore me qeverinë.

Duke folur në një konferencë shtypi të shtunën, kryeministri Scott Morrison iu referua sagës me Djokovic pasi ai këmbënguli që të famshmit nuk përjashtohen nga ndjekja e protokolleve të rrepta COVID të vendit.

“Rregullat janë që ju duhet të vaksinoheni plotësisht. Këto janë rregullat. Ato zbatohen për të gjithë, siç e kanë parë njerëzit së fundmi”, tha ai.

“Nuk ka rëndësi kush je, ato janë rregullat. Ndiqni rregullat, mund të vini. Nuk zbaton rregullat, nuk mundesh”, tha tutje kryeministri.

Kanye mori dozën e tij të parë të vaksinës COVID-19 , përpara se të ndryshonte mendje dhe të vendoste të mos merrte një dozë të dytë, shkruan DailyMail.

“Udhëtova për në Paris disa javë më parë dhe më duhej të kaloja nëpër Lisbonë sepse mund të kaloni nëpër Lisbonë pa u vaksinuar”, tha ai për podcastin Drink Champs vitin e kaluar.

“Kam marrë vetëm një nga vaksinat, kështu që jam gjysmë i vaksinuar”, shtoi ai.

Në vitin 2020, West përhapi gjithashtu teori konspirative rreth vaksinës, duke e quajtur atë “shenja e bishës” dhe duke pretenduar se ishte një komplot për të vendosur mikroçipa te njerëzit.

“Kur thonë se mënyra se si do ta rregullojmë COVID-in është me një vaksinë, unë jam jashtëzakonisht i kujdesshëm. Kjo është shenja e bishës”, tha ai për Forbes në atë kohë.

“Ata duan të vendosin çipa brenda nesh, duan të bëjnë të gjitha llojet e gjërave, për ta bërë atë atje ku ne nuk do mund të kalojmë portat e parajsës”, kishte thënë reperi.

Ekspertët shëndetësorë thonë se vaksinat janë të sigurta dhe efektive dhe se efektet anësore janë të rralla dhe nuk ka asnjë provë që ato përmbajnë mikroçipe.

Por komentet e West mund të kthehen mbrapsht për të nëse ai planifikon të hyjë në Australi së shpejti.

Kur iu anulua viza australiane Djokovicit në fillim të këtij muaji, Ministri i Emigracionit, Alex Hawke pranoi se një nga arsyet ishte ta pengonte atë të nxiste çdo ‘ndjenjë anti-vaksine’ në publikun australian.

“Prania e Novak në Australi, duke pasur parasysh qëndrimin e tij të njohur për vaksinimin, krijon një rrezik për forcimin e ndjenjës antivaksinuese të një pakice të komunitetit australian,” shkroi Hawke.

Djokovic, i cili u kishte thënë zyrtarëve se nuk ishte vaksinuar kundër COVID-19, besonte se ai kishte të drejtë të hynte në vend dhe të merrte pjesë në garë pasi u testua pozitiv për coronavirus muajin e kaluar dhe u shërua plotësisht.

Australia ka patur një rritje të madhe të infeksioneve me virusin gjatë muajit të kaluar për shkak të variantit Omicron, me rreth 2 milionë raste të regjistruara.

Djokovic ka zbuluar tashmë se do të garojë në Kampionatin e Tenisit të Dubait të mbushur me yje muajin e ardhshëm.

Dubai nuk ka të njëjtat kushte strikte për hyrje si Australia, dhe Djokovic do të jetë në gjendje të garojë në turneun që ka fituar pesë herë më parë nëse del negativ në testin PCR kur të mbërrijë.

Ai do të përballet me kampionin në fuqi Aslan Karatsev dhe yjet në ngritje, Andrey Rublev dhe Denis Shapovalov në eventin që do të zhvillohet nga 21 deri më 26 shkurt. /Telegrafi/