Moska thotë se do të pranojë vetëm një ndalim të plotë të zgjerimit të NATO-s

Moska nuk do të pranojë asgjë më pak, përveç garancive të SHBA-së që pengojnë zgjerimin e NATO-s në Ukrainë, paralajmëroi të mërkurën një diplomat i lartë i Kremlinit, ndërsa Rusia mban një qëndrim të ashpër mes tensioneve për grumbullimin e trupave të saj pranë Ukrainës.

Zëvendësministri i Jashtëm, Sergei Ryabkov, i cili udhëhoqi delegacionin rus në bisedimet e sigurisë me SHBA-në në Gjenevë javën e kaluar, ripohoi se Moska nuk ka synime të pushtojë Ukrainën siç frikësohet Perëndimi, por tha se marrja e garancive perëndimore të sigurisë është imperativi kategorik për Moskën.

Që nga nëntori, Rusia ka grumbulluar rreth 100,000 trupa pranë Ukrainës në atë që Perëndimi druhet se mund të paralajmërojë një pushtim, përcjell Telegrafi.

Në një lëvizje që forcon më tej forcat pranë Ukrainës, Rusia ka dërguar një numër të paspecifikuar trupash nga lindja e largët e vendit në aleatin e saj Bjellorusi, e cila ndan një kufi me Ukrainën, për stërvitje të mëdha muajin e ardhshëm.

Zyrtarët ukrainas kanë thënë se Moska mund të përdorë territorin bjellorus për të nisur një pushtim të mundshëm të shumëanshëm.

Ministria ruse e mbrojtjes tha të mërkurën se disa nga trupat e saj tashmë kanë mbërritur në Bjellorusi për stërvitjet “Allied Resolve” 2022.

Ai tha se stërvitja do të mbahet në pesë poligone dhe zona të tjera në Bjellorusi dhe gjithashtu përfshin katër baza ajrore bjelloruse.

Mes tensioneve në rritje, sekretari amerikan i shtetit Antony Blinken vizitoi Ukrainën të mërkurën për të siguruar që ajo mund të llogarisë në mbështetjen perëndimore përballë asaj që ai e quajti agresionin “të pamëshirshëm” rus. /Telegrafi/