Basha: Demokratët janë manipuluar nga Berisha, tubi i oksigjenit të Ramës shkëputet më 11 dhjetor

Kreu i Partisë Demokratike, Lulzim Basha, ka reaguar menjëherë ndaj akuzave të paraardhësit të tij në krye të selisë blu, i cili e quajti atë “kukull” për tetë vjet dhe të paaftë për të fituar zgjedhjet.

Sipas Bashës, Kuvendi i thirrur nga Berisha më 11 dhjetor, nuk është gjë tjetër veçse një tubim dhe asgjë nuk do të ndodhë aty.

Por, ajo që të fillojë, do të jetë ajo çfarë Basha quan “shkëputje e tubit të oksigjenit të Edi Ramës”. Me këtë fjali, ai i referohet një hovi të pretenduar, të cilin Berisha po i jep kryeministrit Rama me betejën që i ka shpallur për kreun e PD-së.

“Unë nuk komentoj vendimet e SHBA-ve”, riktheksoi Basha. “Si unë si Berisha, kemi mbajtur qëndrime ndaj atyre, të cilëve janë shpallur non grata. Sot, Sali Berisha i serviri për herë të fundit shqiptarëve gënjeshtrat e tij”.

Kështu, kreu i bluve ravijëzoi faktin se sipas tij, “Shqipëria e vlerave nuk mund të vijë përmes gënjeshtrave”.

“Demokratët janë manipuluar nga Sali Berisha. Trekëndëshi i Bermudave (referuar treshes Berisha-Rama-Meta), do ta përçajë PD-në. Por, pas Berishës, radhën e kanë edhe të tjerët”.

Kështu mendon Basha, i bindur se ai do të ndalë fitimtar nga lufta përballë Berishës.

Sakaq, qëllimi i vetëm për të, mbetet Shqipëria dhe shqiptarët. Ndërsa, qëllimi i Berishës, mbetet interesi i tij personal, në mbivendosje me interesat e çdo demokrati.

Në përmbyllje të fjalës së tij, Basha e ka ftuar vetë Berishën në Kuvendin që ai ka thirrur, më 18 dhjetor.

“Në datë 18, ka Kuvend. Berisha nëse do Kuvend, le të vijë aty”.

Berisha ndaj Escobar: Shqiptarët nuk i pranojnë vendimet nga kukullat

Ish-kryeministri i Shqipërisë, Sali Berisha, ka deklaruar në një bisedë telefonike në emisionin “Opinion” në Tv Klan, se “vendimet nga kukullat, shqiptarët nuk i pranojnë”, duke iu referuar vizitës së të dërguarit të posaçëm të SHBA-ve në Ballkanin Perëndimor, Gabriel Escobar.

Sipas Berishës, vendimi i SHBA-ve lidhet me një lobim të qartë kundër tij. Për këtë shkak, shpalljen non grata nga amerikanët, ai vijon ta quajë të pavlerë.

Mbi aksionin e tij, ai ka thënë se atë do të vijojë ta shtrijë vetëm në gjykatë. Pra, duke lënë të kuptohet se nuk do të ketë lobime në asnjë strukturë, përpos procesit që ka hapur ndaj Sekretarit amerikan të Shtetit, Antony Blinken, në Gjykatën e Parisit.

“Do të shihni se çfarë turpi ndodhet në dosjet ku është bazuar përcaktimi i Sali Berishës”, deklaroi ai.

Mbi duelin e tij me kreun aktual të Partisë Demokratike dhe pasuesin e tij, Lulzim Bashën, ai tha se ky i fundit, duhet të jepte dorëheqjen prej kohësh.

“Ndryshimi im dhe i Lulzim Bashës është shumë i madh. Ai ka humbur katër palë zgjedhje dhe ende nuk ka dhënë dorëheqjen”, vijoi retorikën ai.

Për sa i përket Kuvendit të thirrur prej tij në 11 dhjetor 2021, Berisha e ka rritur numrin e firmave të mbledhura nga delegatët. Ai ka thënë se ato kanë shkuar në rreth 5 mijë e 200, nga 4 mijë e 200 që pati dorëzuar më parë për mbledhjen e Kuvendit./APost/