Dy medikamente të terapisë me antitrupa për të luftuar Covid-19 marrin miratimin nga organi shëndetësor i BE-së

Dy medikamente të terapisë me antitrupa për të luftuar Covid-19 kanë fituar miratimin nga Agjencia Evropiane e Barnave (EMA), njoftoi organi të enjten.

Sipas mediave të huaja, përcjell Telegrafi, EMA rekomandon autorizimin e Ronapreve nga kompania farmaceutike zvicerane Roche dhe Regkirona nga Celltrionto e Koresë së Jugut që trajtojnë Covid-19 për pacientët që nuk kanë nevojë për oksigjen shtesë për të marrë frymë dhe përballen me një rrezik të lartë të infeksionit të rëndë.

Komisioni Evropian gjithashtu duhet të japë bekimin e tij përpara se të dy barnat të mund të hyjnë në tregun e përbashkët të BE-së, por kjo konsiderohet një formalitet.

Ronapreve përbëhet nga dy përbërës aktivë – casirivimab dhe imdevimab – dhe është bashkëprodhuar nga prodhuesi amerikan Regeneron Pharmaceuticals.

EMA e miratoi atë për të trajtuar njerëzit e moshës 12 vjeç e lart.

Regkirona – e bërë nga përbërësi aktiv regdanvimab – u miratua për të gjithë të rriturit.

EMA me bazë në Amsterdam tha se profili i sigurisë së të dy ilaçeve ishte i favorshëm, duke vënë në dukje vetëm një numër të vogël reagimesh të lidhura me të.

Deri më tani, remdesivir ishte i vetmi ilaç që agjencia ka miratuar për trajtimin e Covid-19 ndërkohë që tre të tjera janë në shqyrtim nga ekspertët e EMA-s.

Komisionerja Evropiane e Shëndetësisë, Stella Kyriakides e përshëndeti një vendim të tillë.

“Me infeksionet Covid-19 në rritje në pothuajse të gjitha shtetet anëtare, është qetësuese të shohim shumë trajtime premtuese në zhvillim”, tha ajo në një deklaratë me shkrim.

“Ndërsa BE-ja ka një nga normat më të larta të vaksinimit në botë, njerëzit do të vazhdojnë të sëmuren dhe të kenë nevojë për trajtime të sigurta dhe efektive për të luftuar infeksionin dhe për të përmirësuar perspektivat jo vetëm për një shërim më të shpejtë, por edhe për mbijetesë”, ka thënë më tej Kyriakides. /Telegrafi/