Bregu: RCC ndihet krenare për arritjen e rezultateve, të cilat janë të prekshme, konkrete, për qytetarët e Ballkanit Perëndimor

Këshilli i Bashkëpunimit Rajonal (RCC) është vlerësuar nga European Western Balkans për përkushtimin e tij të vazhdueshëm, për të ardhmen evropiane të rajonit, forcimin e bashkëpunimit rajonal dhe lidhjen mes ekonomive të rajonit, përmes realizimit të Roamingu-ut falas në Ballkanin Perëndimor, si dhe për punën e bërë për avancimin e bashkëpunimit ekonomik në Ballkanin Perëndimor.

“Faleminderit European Western Balkans që zgjodhët të nderoni RCC me këtë çmim. Jam e kënaqur dhe e emocionuar sepse nuk ndodh çdo ditë që puna, mundi dhe përkushtimi të njihet e vlerësohet kështu. Ne jemi me të vërtetë ballkano-perëndimorë evropianë, një organizatë rajonale që ndihet krenare për arritjen e rezultateve të prekshme për qytetarët tanë. RCC punon në fushën e politikave – çka nuk shihet e nuk perceptohet dot lehtë nga publiku i gjerë. Por, gjithçka që bëjmë ka për qëllim përmirësimin e jetës së qytetarëve të Ballkanit Perëndimor dhe afrimin e tyre një hap më pranë njëri-tjetrit dhe me Evropën. Ndaj krenohemi që kemi një rol të rëndësishëm në mundësimin e Roaming-ut falas në Ballkanin Perëndimor, ndërsa po punojmë edhe për uljen e kostove të roaming-ut ndërmjet BE-së dhe rajonit tonë. Dhe kjo nuk është pika e vetme në axhendën tonë. Është edhe njohja reciproke e kualifikimeve profesionale dhe akademike në të gjithë rajonin, udhëtimi i lirë për qytetarët brenda Ballkanit Perëndimor vetëm me karta identiteti, janë nismat për mjedisin që kanë krijuar axhendën tonë të gjelbër rajonale, dixhitalizimi i vazhdueshëm, fuqizimi i grave dhe të rinjve për të ndaluar ikjen e trurit jashtë rajonit, etj. Të gjitha këto bëhen në një qasje rajonale, për një rajon më të mire”, tha Majlinda Bregu sekretare e përgjithshme e Këshillit për Bashkëpunimin Rajonal,  në ceremoninë e ndarjes së çmimeve.

Çdo vit, European Western Balkans (EWB) vlerëson individë dhe organizata për kontributin e tyre në integrimin evropian të rajonit. Çmimi u krijua në vitin 2019, me rastin e pesëvjetorit të portalit. Marrësi i parë i çmimit ishte ministri i atëhershëm i Punëve të Jashtme të Maqedonisë së Veriut, Nikola Dimitrov, ndërsa për vitin 2020, deputetja e Parlamentit Evropian Tanja Fajon.

Nemanja Todoroviq Shtiplija, kryeredaktor i European Western Balkans tha: “Kjo është hera e parë që çmimi vjetor i EWB i jepet një organizate, përkatësisht Këshillit të Bashkëpunimit Rajonal. Ne besojmë se përpjekjet kolektive që RCC ka bërë për evropianizimin dhe integrimin ekonomik të rajonit që nga krijimi i tij në 2008, kanë formësuar në mënyrë të pakthyeshme Ballkanin Perëndimor për mirë. Një nga pikat kryesore të këtij viti ka qenë prezantimi i Roam-Free-Western-Balkans. Së bashku me iniciativat që RCC ka iniciuar gjatë pandemisë COVID-19 dhe punën në drejtim të Tregut të Përbashkët Rajonal, këto aktivitete tregojnë se sa i domosdoshëm është bërë roli i tyre në rajon. Shpresojmë që ky çmim të jetë një kontribut i vogël në motivimin e tyre për të vazhduar punën e tyre të rëndësishme”.