Drejtori i Policisë: Kemi dërguar kapacitetet dhe aftësinë tonë për të siguruar mbrojtje ndaj të akuzuarve në Gjykatën Speciale

Drejtori i Policisë së Kosovës, Samedin Mehmeti tha sot se Policia e Kosovës ka dërguar kapacitetin, aftësinë e tyre dhe mundësinë tonë për me siguru lirim me kusht për të akuzuarit në Gjykatën Speciale.

Mehmeti gjatë raportimin në Komisionin për Siguri dhe Mbrojtje u pyet rreth kësaj çështje, ndërsa tha se pyetjet rreth Dhomave të Specializuara t’u bëhen Dhomave të Specializuara, e jo Policisë.

“Besoj që opinioni publik tashmë e din që neve na u janë bërë kërkesa nga avokatët mbrojtës dhe ne i kemi adresuar kërkesat nga avokatët mbrojtës… Ndërsa pyetjet rreth Dhomave të Specializuara kisha pasur dëshirë që të na kurseni neve dhe tua bëni Dhomave të Specializuara. Unë u përgjigja që avokatët mbrojtës kanë bërë kërkesa për kushtet për lirim me kusht. Ne i kemi dërguar kapacitetin, aftësinë tonë dhe mundësinë tonë për me siguru lirim me kusht…”, ka thënë Mehmeti.

Ndryshe, Dhomat e Specializuara në Hagë, kanë lëshuar një urdhër për Policinë e Kosovës për t’u përgjigjur në detaje nëse ata mund të sigurojnë mbrojtjen në liri të ish-krerëve të UÇK-së.

Policia e Kosovës sipas urdhrit të lëshuar më 8 tetor nga gjyqtari i procedurës paraprake, Nicolas Guillou kanë dy javë kohë, prej kësaj date, që të përgjigjen për kërkesën e Dhomave të Specializuara për Kosovën. /Telegrafi/