Mijëra njerëz protestojnë në Poloni, kërkojnë që vendi të mbetet në BE

Mijëra njerëz në të gjithë Poloninë demonstruan kundër një vendimi të diskutueshëm nga Gjykata Kushtetuese dhe që vendi i tyre të mbetet në Bashkimin Evropian.

Në Varshavë, demonstruesit valëvitën flamujt polakë dhe të BE-së, duke bërtitur “Ne qëndrojmë” dhe “Ne jemi Evropa!”.

Ka pasur gjithashtu protesta në Danzig, Poznan, Szczecin, Krakow dhe shumë qytete të tjera.

Gjykata Kushtetuese e vendit kohët e fundit vendosi që elementë të caktuar të ligjit të BE-së shkelin Kushtetutën polake. Kështu, ajo i jep përparësi të drejtës kombëtare mbi të drejtën e BE-së.

Ky vendim nxit më tej konfliktin midis Komisionit Evropian dhe Varshavës mbi reformën e sistemit gjyqësor polak, përcjell Telegrafi.

Ish-presidenti i Këshillit Evropian dhe lideri polak i opozitës Donald Tusk bënë thirrje për protesta.

Gjatë paraqitjes së tij para demonstruesve, ai akuzoi partinë konservatore në pushtet PiS se donte ta çonte vendin jashtë BE.

“Vendi i Polonisë është në Evropë”, u tha Tusk protestuesve në Varshavë. “Ne do të fitojmë sepse jemi shumica”.

Ndërkohë në Danzig, laureati i Çmimit Nobel për Paqe dhe ish-presidenti polak Lech Walesa iu drejtua demonstruesve.

“Njerëzit që drejtojnë shtetin sot janë një fatkeqësi e madhe për Poloninë”, tha Walesa. “Asnjë armik që ka qeverisur ndonjëherë Poloninë nuk i ka ndarë njerëzit e vendit si PiS”, shtoi ai.

Komisioni Evropian tashmë ka hapur disa procedura për shkelje kundër Varshavës për shkak të reformave dhe ka ngritur padi në Gjykatën Evropiane të Drejtësisë. /Telegrafi/