Britanikja 15-vjeçare vdiq nga coronavirusi në ditën kur do të vaksinohej

Një vajzë 15-vjeçare që rezultoi pozitive me COVID-19 ka vdekur ditën kur ajo do të vaksinohej, tha familja e saj.

Sipas The Guardian, përcjell Telegrafi, Jorja Halliday, nga Portsmouth, vdiq në spitalin Queen Alexandra të martën, pasi kishte rezultuar pozitive me coronavirusin katër ditë më parë.

Nëna e saj, Tracey Halliday, 40-vjeçare, tha se studentja në Akademinë Portsmouth ishte një “vajzë e dashur”, me shumë miq, një kickboxer e talentuar dhe një muzikante aspiruese.

“Ajo ishte shumë aktive, i pëlqente të dilte dhe të kalonte me miqtë e saj dhe i pëlqente të kalonte kohë me vëllezërit dhe motrat e saj”, ka thënë nëna e 15-vjeçares.

Ajo tha se Jorja, e cila nuk kishte sëmundje ekzistuese, kishte zhvilluar simptoma të ngjashme me gripin para se të bënte testin PCR ku rezultoi pozitive, duke çuar në izolimin e saj në shtëpinë e tyre.

Jorja kishte problem të ushqehej të dielën, dhe të hënën nuk mund të hante fare për shkak të dhimbjes së fytit.

Një mjek i përshkroi antibiotikë, por gjendja e saj u përkeqësua dhe u kontrollua nga një mjek i cili tha se rrahjet e zemrës së saj ishin dyfishi i asaj që duhet të ishte dhe ajo u dërgua në spital.

Rezultatet paraprake nga ekzaminuesi mjekësor i spitalit treguan se Jorja kishte miokardit të COVID-19, inflamacion i zemrës i shkaktuar nga virusi. Halliday shpjegoi se Jorja ishte regjistruar për të marrë vaksinën të martën, por rezultoi pozitive të shtunën më parë. Ajo kishte planifikuar ta merrte vaksinën pasi të kishte mbaruar periudha e izolimit, por vdiq në ditën kur kishte rezervuar vaksinën. /Telegrafi/