PSD: Qeveria nuk reagoi pasi u përdorë dhunë nga policia, por pas presionit të madh të qytetarëve

Reagimin e Qeverisë së Kosovës, pas dhunës së përdorur dje nga Policia e Kosovës gjatë arrestimit të aktivistëve të Partisë Socialdemokrate, këta të fundit po e konsiderojnë të vonshëm.

Nga PSD-ja përmes një komunikate për medie, kanë thënë se ky reagim ka ardhur vonë dhe “prej zorit”.

Sipas tyre, reagimi nuk është bërë pas dhunës së përdorur e as pas arrestimit të aktivistëve, por pas presionit të madh të qytetarëve.

“Reagimi i Qeverisë nuk erdhi pasi u përdor dhunë nga policia, as pasi u arrestuan aktivistët. Qeveria ka reaguar vetëm pas presionit të madh të qytetarëve dhe opinionit publik. Prandaj reagimi doli në ora 23:00. Kjo është mënyra e vetme sesi ky pushtet matet. Reagimi është i vonshëm, dhe erdhi prej zorit”, thuhet në komunikatë.

Tutje ata shtojnë se, “Dhuna policore ndaj aktivistëve tregon për fillimin e përndjekjeve”.

“Ajo merr forma të ndryshme në kohë, por qëllimi është i njëjtë: paqtimi i dallimeve, dëgjueshmëria, disiplinimi. Policët më të zellshëm në ushtrimin e dhunës janë ata që marrin tagrin moral e politik prej populizmit të Kryeministrit Kurti”.

Sipas tyre, “Rendet me tendenca totalitare janë të rrezikshme sepse funksionojnë pa nevojën për komandime direkte nga sipër”.

“Dhuna policore është e papranueshme. Qeveria nuk mund të fshihet prapa një reagimi e një suspendimi të policit. Qeveria fshihet prapa një reagimi që flet për të drejtën për protestë, e në njëjtën kohë dhe për të njëjtin parim mbanë të burgosur Kryetarin e PSD-së. Por t’i kthehemi përsëri pyetjes qendrore: Pse 5 euro tiketë? Pse po krijohet monopoli? Pse?”, thuhet në komunikatë.

Qeveria e Kosovës ka reaguar pas protestës së mbajtur të Partisë Socialedemokrate, ku u arrestuan tetë anëtarë të saj.

Lexo po ashtu Qeveria reagon pas aksionit të PSD-së: Jemi të shqetësuar nga pamjet e dhunës

Qeveria në reagimin e bërë për media thotë se është e shqetësuar nga pamjet e dhunës gjatë aksionit të PSD-së, transmeton Telegrafi.

“Ne besojmë në të drejtën për protestë demokratike sepse ajo para se gjithash është një e drejtë e patjetërsueshme që kultivohet dhe garantohet në shoqëritë demokratike. E tillë është shoqëria jonë dhe Qeveria e Republikës së Kosovës afirmon këtë të drejtë. Jemi të shqetësuar nga pamjet e dhunës sot gjatë një aksioni të Partisë Socialdemokrate. Policia e Kosovës ka përgjegjësinë për ruajtjen e rendit, qetësinë publike dhe mbrojtjen e pronës, duke respektuar të drejtat e njeriut”, thuhet në reagim. /Telegrafi/