KRU “Gjakova: Uji është i sigurt për konsum, nuk ka vend për shqetësim

Kompania Rajonale u Ujësjellësit “Gjakova” ka siguruar konsumatorët se uji është i sigurt për konsum dhe se nuk ka vend për shqetësim.

Me anë të një postimi në Facebook, kjo kompani shkruan se pas dyshimeve për kontaminimin e ujit të pijes në komunën e Deçanit, janë shfaqur dyshime dhe shqetësime të pabazuara edhe tëk banorët e komunës së Gjakovës.

“E kemi obligim moral që të sqarojmë  konsumatorët të cilët furnizohen nga rrjeti i ujësjellësit të KRU”Gjakova”, duke i informuar që nuk ka vend për shqetësime, sepse trajtimi i Ujit për Pije që furnizon konsumatorët e KRU ”Gjakova”, bëhet sipas proceseve teknologjike për trajtim, në Impiantin e Trajtimit të Ujit për Pije, gjegjësisht në Stacionin e Filtrimit”.

“Proceseve të cilave u nënshtrohet uji i cili synohet të përdoret për konsum njerëzor, është shumë i sigurt dhe nuk ka vend për shqetësime, përveç tjerash cilësia monitorohet gjatë 24 orëve, duke iu nënshtruar testeve mikrobiologjike dhe fiziko-kimike nga laboratorët e akredituar, nga të cilat rezultate uji është shumë cilësor dhe në përputhje me vlerat parametrike bazuar në Standardet Cilësore të U.A 16/2012 dhe ato evropiane”, thuhet mes tjerash në njoftim.