Greqia do të shpërblejë të rinjtë me nga 150 euro, nëse pranojnë të vaksinohen kundër COVID-19

Greqia do t’u japë të rriturve të rinj 150 euro për t’u vaksinuar ndërsa nis një politikë në dy nivele gjatë verës, tha të hënën kryeministri Kyriakos Mitsotakis.

Sipas mediave të huaja, përcjell Telegrafi, Mitsotakis tha se duke filluar nga 15 korriku, qytetarët grekë nën moshën 26 vjeç do të kishin të drejtë “për kredi në një portofol dixhital” pasi të kishin marrë dozën e parë të vaksinimit të tyre kundër COVID-19.

“Shpresojmë që të rinjtë të përfitojnë nga kjo mundësi. Shteti ju falënderon për veprimet me përgjegjësi dhe për bërjen e diçkaje që jam i sigurt se do të kishit bërë gjithsesi”, ka thënë Mitsotakis në një fjalim televiziv.

Të varur shumë nga turizmi, Greqia po kërkon mënyra për të rihapur plotësisht ekonominë e saj pasi kohët e fundit vaksinimin e bëri të disponueshëm për të gjitha grupmoshat e rritura.

Dhe Kyriakos Pierrakakis, një ministër për politikën dixhitale, tha se skema e portofolit dixhital do të përqendrohet në industrinë e turizmit dhe argëtimit.

“Kjo kartë nuk do të pranohet kudo. Ajo do të synohet për aktivitete specifike”, tha Pierrakakis. “Mund të përdoret (për të blerë) bileta aeroplani, trageti dhe hekurudhore, për makina me qira, vendet e kampit, akomodime (për pushime), shërbime udhëtimi, kinema, shfaqje teatri dhe muzike dhe vallëzimi, muze, vende arkeologjike, ndër shërbime të tjera”.

Zyrtarët qeveritarë thonë se “liri shtesë” do t’u jepen mbajtësve të certifikatave të vaksinimit, por nuk kanë përfunduar detajet e kësaj politike, duke shtuar se ata po shqyrtojnë gjithashtu opsionet ligjore për ta bërë vaksinimin të detyrueshëm për kategori të ndryshme të punësimit, përfshirë stafin e shtëpive të pleqve.

Deri në 100,000 njerëz janë duke marrë dozat e para të vaksinimit çdo ditë në Greqi, një vend me 10.7 milionë banorë.

Por hezitimi midis grupeve të caktuara të moshës për t’u vaksinuar është një shqetësim i madh për zyrtarët e shëndetit publik pasi infeksionet e variantit shumë ngjitës delta vazhdojnë të rriten në të gjithë Evropën.

Ndërkohë rreth 35 për qind e popullsisë së përgjithshme, ose 42 për qind e popullsisë së rritur, do të kenë përfunduar vaksinimin e tyre deri në fund të qershorit, sipas vlerësimeve të qeverisë, me numra që do të rriten në 48 për qind dhe 57 për qind, përkatësisht, në fund të korrikut. /Telegrafi/