Sveçla pas konfiskimit të 30 kilogramëve marihuanë: Kosova do të jetë zonë e ndaluar e trafiqeve ilegale

Pas konfiskimit të 30 kilogramëve marihuanë, ka reaguar Ministri i Punëve të Brendshme, Xhelal Sveçla.

Nëpërmjet një reagimi në Facebook, ai tha se ashtu siç janë zotuar, lufta kundër trafikimit të të gjitha llojeve do të vazhdojë me intensitet edhe më të shtuar.

“Mbrëmë në pikën kufitare në Vërmicë janë konfiskuar 30 kilogramë substancë narkotike e llojit marihuanë. Lidhur me këtë Policia e Kosovës ka arrestuar personin nën dyshimin e kryerjes së veprës penale “Blerja, posedimi, shpërndarja dhe shitja e paautorizuar e substancave psikotrope dhe analoge”. Ashtu siç jemi zotuar, lufta kundër trafikimit të të gjitha llojeve do të vazhdojë me intensitet edhe më të shtuar. Kosova do të jetë zonë e ndaluar e trafiqeve ilegale”, ka shkruar Sveçla.

Lexo po ashtu Policia kap 30 kilogramë marihuanë në Vermicë - arrestohet një person

Ndërsa mbrëmjen e së hënës Policia e Kosovës në pikën kufitare Vërmicë ka arrestuar një person pasi që në veturën e tij kanë gjetur një sasi të marihuanës.

I arrestuari F.M i (1981) është kapur pasi që vinte nga Shqipëria me një veturë të tipit “Fiat Croma”.