Kurti, opozitës: Jeni të paaftë për të kritikuar Qeverinë, mund t’ju jap ide se si të kritikoni

Kryeministri i Kosovës, Albin Kurti në seancën e sotme të Kuvendit të Kosovës ka kritikuar opozitën për mungesë të kritikës së mirëfilltë ndaj Qeverisë.

Kurti ka thënë se shumë herë ka folur për kriminelët e luftës dhe paqes.

“Edhe në këtë kuvend edhe në media unë kam folur për kriminelët e luftës dhe paqes, nuk e kam thënë për herë të parë në Bruksel. Serbia e din për kënd e kom pas fjalën, nuk e di pse në Kosovë lajmërohen disa.. Unë nuk besoj që ka luftëtar të UÇK që janë kriminel të luftës, por unë besoj që kriminel të luftës nuk ka vetëm në Serbi, por ka edhe në veri, në Bosnje e mund të ketë edhe në Mal të Zi”, ka thënë Kurti.

Kryeministri ka shtuar se rreziku më i madh për Qeverinë e tij është mungesa e kritikës, shkruan Telegrafi.

“Më lejoni t’ju them që unë këtu shoh një lloj paaftësie për të na bërë kritikë, dhe rreziku më i madh për Qeverinë është mungesa e kritikes, ne nuk kemi rrezik tjetër. Ne kemi problem të madh me juve se jeni të paaftë me ba kritikë. Ne nuk po shohim e as nuk po e dëgjojmë kritikën e opozitës”, ka thënë Kurti.

Ai i është drejtuar opozitës që mund të bashkëpunoj me ta edhe në këtë drejtim.

“Më lejoni të shpreh gatishmërinë time për bashkëpunim edhe në këtë çështje. Mund t’ju jap ide se si të na kritikoni, unë nuk bëjë ofertë pa kërkesë Nëse na bëni kritikë vetëm duke shpifur, kjo tregon paaftësinë tuaj për kritikë”, tha Kurti. /Telegrafi/