Deputetja e PDK-së pyet Gërvallen për postimin në Twitter, ministrja sqaron se çfarë ndodhi

Deputetja e PDK-së, Ariana Musliu-Shoshi ka pyetur ministren e Jashtme, Donika Gërvalla lidhur me një postim të publikuar mbrëmë nga MPJD-ja i cili shkaktoi reagime të shumta.

Musliu-Shoshi në mbledhjen e Komisionit për Punë të Jashtme, tha se ky postim ishte i pa-strukturuar dhe kishte një anglishte të nivelit të parë.

“Mos keni filluar të mendoni se Kosova është më e fortë me qeverinë tuaj, dhe ju do ta merrni barrën për ta sfiduar Rusinë”, ka thënë Musliu-Shoshi.

Në përgjigjen e saj ministrja Gërvalla tha se mbanë përgjegjësinë e plotë politike për atë postim.

Lexo po ashtu MPJ rikthen postimin e fshirë për Rusinë, por me përmirësime

“Ju jap plotësisht të drejtë, e marr përgjegjësinë politike për atë postim. Duke u munduar në 270 shkronja në mesazh të komplikuar duke lënë anash lidhëset ka shkaktuar një tekst të tillë”, ka thënë Gërvalla.

Ajo më tej ka sqaruar edhe mesazhin që kanë dashur ta përçojnë përmes atij postimi, duke thënë se asnjëherë nuk ka qenë mesazhi ai që Kosova është e fortë.

“Kemi marrë të njëjtin tekst e kemi zgjeruar në fjalorë dhe kemi futur të gjitha lidhëzat që kanë munguar dhe tash kemi një mesazh të kuptueshëm. Është një mesazh që kemi dashur ta përçojmë. Kosova synon dhe do të jetë gjithmonë në anën e aleatëve të saj të rëndësishëm në çdo fazë të lehtë apo të vështirë. Në atë postim nuk shkruan që Kosova është e fortë dhe perëndimi është i dobët, por shkruan që Putini e llogarit që perëndimi të jetë i dobët. Ai mesazh dëshiron të tregojë që Kosova qëndron fort në krahë të aleatëve të saj”, tha Gërvalla. /Telegrafi/