Trajneri i Lituanisë: Kosova ka ekip të fortë, do të jetë përballje e vështirë

Sot (e mërkurë) me fillim nga ora 20:45, përfaqësuesja e Lituanisë do të zhvillojë një ndeshje miqësore kundër Kosovës në stadiumin “Fadil Vokrri”.

Trajneri i Dardanëve, Bernard Challandes, e konfirmoi mbrëmë se për ndeshjet kundër Lituanisë, Suedisë dhe Spanjës, do të jetë pa shërbimet e mbrojtësit të Napolit, Amir Rrahmani, kurse në anën tjetër Valdas Urbonas, i cili është trajner i Lituanisë, e ka konfirmuar se në këtë ndeshje do të mungojë Paul Golubick.

Po ashtu, para ndeshjes me Kosovën, trajneri Urbonas u pyet rreth Dardanëve, ku tregoi që skuadra e tije do ta cilësojë këtë ndeshje të vështirë, pavarësisht faktit që është miqësore, përcjell KosovaPress.

Lexo po ashtu Lajm i hidhur për Kosovën para ndeshjeve kualifikuese: Amir Rrahmani kthehet te Napoli

“Kosova ka ekip të fortë, do të jetë një përballje e vështirë, por ne i kemi objektivat tona që dëshirojmë t’i arrijmë, zhvillojmë ndeshje të dielën kundër Zvicrës, kurse kundër Kosovës do kërkojmë ti arrijmë qëllimet tona”, ka thënë trajneri i Lituanisë.

Njëherësh, në konferencë për media foli edhe portieri Tomas Svedkuskas, i cili tregoi se edhe pse është miqësore, skuadra e tij duhet të tregojë seriozitet.

“Pavarësisht që kjo nuk është ndeshjes zyrtare, trajneri na ka thënë që nuk ka miqësore dhe do të luftojmë vetëm për fitore. Skuadra e Kosovës është e mirë, ka lojtar shumë të mirë që luajnë në Bundesligën gjermane dhe në Serie A, nuk do të jetë ndeshje e lehtë për ne”, është shprehur portieri.

Kosova do të nisë vitin 2021 me miqësoren kundër Lituanisë, kurse më pas do të vazhdojë me përballje kundër Suedisë dhe Spanjës.