KEDS dënon sulmet që po u bëhen punëtorëve gjatë kryerjes së detyrës

Sot në Prizren një punëtor i KEDS-it është sulmuar fizikisht nga konsumatori gjatë kohës sa i njëjti ishte duke kryer detyrën e tij.

Sipas një njoftimi për media, si pasojë e këtij sulmi, punëtori i KEDS-it ka pranuar tretman mjekësor ndërkaq sulmuesi është shoqëruar në polici.

“Raste të tilla të sulmeve agresive ndaj punëtorëve të KEDS janë një dukuri shqetësuese në rritje, që si pasojë po rrezikojnë jetën dhe shëndetin e punëtorëve të KEDS, e të cilat janë të pa tolerueshme. Kësisoj, KEDS u bën thirrje konsumatorëve që t’i ndalin sulmet dhe të mos pengohen zyrtarët e kompanisë në kryerjen e detyrave të tyre zyrtare”, thuhet në njoftim.

Njëherazi, siç bëhet e ditur në njoftim KEDS-i kërkon nga organet e drejtësisë që të trajtojnë me seriozitetin më të lartë secilin rast të pengimit të punëtorëve të kompanisë në kryerjen e detyrave zyrtare dhe të ndërmerren veprime konkrete ligjore që ndihmojnë në parandalimin e këtyre dukurive negative, pasi veprimet e tilla do të kenë impakt në distribuimin e energjisë elektrike tek të gjithë konsumatorët.

“KEDS, mbetet e përkushtuar për t’u shërbyer qytetarëve në ofrimin e shërbimeve të distribuimit dhe furnizimit me energji elektrike si dhe në trajtimin e barabartë të gjithë secilit”, thuhet ndër të tjera në njoftim. /Telegrafi/