SHBA nuk do ta sanksionojë princin saudit, pavarësisht “implikimit të tij në vrasjen e Khashoggit”

Shtetet e Bashkuara të premten për herë të parë akuzuan publikisht Princin e Kurorës Saudite Mohammed bin Salman për “miratimin e vrasjes së tmerrshme të gazetarit disident Jamal Khashoggi”, duke zbuluar një sërë masash ndëshkimore por duke ndaluar drejtpërdrejt shënjestrimin e trashëgimtarit.

Sipas medieve të huaja, përcjell Telegrafi, Princi, i cili është sundimtar de facto i aleatit të vjetër të SHBA-së dhe ofruesit të naftës, “miratoi një operacion në Stamboll, Turqi për të kapur ose vrarë gazetarin saudit Jamal Khashoggi”, tha një raport i inteligjencës i deklasifikuar rishtas nga administrata e presidentit Joe Biden.

Raporti tha se duke pasur parasysh ndikimin e Princit Mohammed, ishte “shumë e vështirë” që vrasja e vitit 2018 të kishte ndodhur pa “dritën e gjelbër të tij”.

Vrasja gjithashtu përshtatet me një model të “mbështetjes së princit të kurorës për përdorimin e masave të dhunshme për të heshtur disidentët jashtë vendit”, shkruan France24.

Khashoggi, një kritik i Princit Mohammed i cili shkroi për Washington Post dhe ishte një banor i SHBA-së, u josh në konsullatën Saudite në Stamboll në tetor të vitit 2018, më pas u vra dhe u “copëtua”.

Për nder të shkrimtarit të vrarë, Sekretari i Shtetit, Antony Blinken njoftoi “Aktin Khashoggi” që do të ndalojë hyrjen në Shtetet e Bashkuara të të huajve që kërcënojnë disidentë ose ngacmojnë reporterët dhe familjet e tyre dhe vendosi menjëherë 76 sauditë në listën e zezë.

“Ne e kemi bërë absolutisht të qartë se kërcënimet dhe sulmet ekstraterritoriale nga Arabia Saudite kundër aktivistëve, disidentëve dhe gazetarëve duhet të marrin fund. Ato nuk do të tolerohen nga Shtetet e Bashkuara”, citohet të ketë thënë Blinken në një deklaratë. /Telegrafi/