Rreth 1 në 10 të prekur nga COVID-19 mbeten të sëmurë pas 12 javësh – ndoshta edhe shumë më gjatë

Dega Evropiane e Organizatës Botërore të Shëndetësisë tha të enjten se pacientët që përjetojnë simptoma të post-covid edhe më tej duhet të dëgjohen dhe pasojat afatgjata duhet të bëhen një përparësi nga autoritetet shëndetësore.

“Ata që vuajnë pasojat edhe pas COVID-19 duhet të dëgjohen nëse duam të kuptojmë pasojat afatgjata dhe rimëkëmbjen nga COVID-19. Kjo është një përparësi e qartë për OBSH-në dhe e një rëndësie të madhe – dhe duhet të jetë për çdo autoritet shëndetësor”, ka thënë Hans Kluge, drejtori rajonal për OBSH Evropë, gjatë një konference për shtyp, shkruajnë mediat e huaja, përcjell Telegrafi.

Ndërsa disa studime kanë filluar të hedhin dritë mbi sëmundjen, është ende e paqartë pse disa pacientë me Covid-19 vazhdojnë të shfaqin simptoma për muaj, duke përfshirë lodhjen, “kthjelltësinë”, si dhe çrregullimet kardiake dhe neurologjike.

“Barra është reale dhe është e konsiderueshme. Rreth një në 10 të sëmurë nga Covid-19 mbeten të sëmurë pas 12 javësh dhe shumë më gjatë”, citohet të ketë thënë Kluge.

OBSH në Evropë u bëri thirrje vendeve dhe institucioneve evropiane që “të bashkohen si pjesë e një axhende të integruar kërkimore”, duke harmonizuar mjetet e mbledhjes së të dhënave dhe protokollet e studimit.

Drejtori rajonal gjithashtu tha se ai do të bashkonte 53 vendet anëtare të rajonit Evropian të OBSH-së, duke përfshirë disa vende në Azinë Qendrore, “për të përcaktuar një strategji rajonale”.

Në fillim të shkurtit, OBSH organizoi seminarin e parë virtual kushtuar të ashtuquajturit “Long Covid”, me qëllim që ta përcaktojë siç duhet, t’i japë një emër zyrtar dhe të harmonizojë metodat për studimin e tij. /Telegrafi/