Në rregullatorin e transmetimit në Angli paraqiten 78 ankesa për spektaklin “Dancing On Ice” pasi ftuan Rita Orën në program

Spektakli i famshëm birtanik “Dancing On Ice” është goditur me ankesa të shumta nga Ofcom (Zyrat e Komunikimeve), nga shikuesit pas performancës së Rita Orës në shfaqjen e së dielës në mbrëmje.

30-vjeçarja këndoi këngën e saj më të re “Bang Bang” në një performancë të regjistruar paraprakisht, por fansat nuk patën konsideratë për faktin se ajo ende e ka të freskët skandalin e thyerjes së rregullave të izolimit që bëri muaj më parë, shkruan DailyMail.

Të tërbuar për përshtatshmërinë e paraqitjes së saj në shfaqjen e ITV, disa shikues u ankuan në vëzhguesin e televizionit dhe Ofcom konfirmoi të mërkurën se kishin pranuar dhe më pas paraqitur 78 ankesa kundër programit.

Zyra e Komunikimeve, e njohur zakonisht si Ofcom, është autoriteti rregullator dhe i konkurrencës i aprovuar nga qeveria për transmetimin, telekomunikacionin dhe industritë postare të Mbretërisë së Bashkuar. Ofcom ka fuqi të gjera në të gjithë sektorët e televizionit, radios, telekomit dhe sektorit postar.

Të dielën, adhuruesit e shfaqjes gjithashtu u shprehën të mllefosur në rrjetin social Twitter për të kritikuar vendimin e kanalit për të shfaqur Ritën – e cila është ende relativisht e përfshirë në skandal pas tentimit të organizimit të festës së saj të paligjshme për ditëlindjen e 30-të.

Pavarësisht nga kjo, Rita dhuroi një spektakël të vërtetë gjatë paraqitjes në “Dancing On Ice” e veshur me një kostum të kuq për shfaqjen me temë të Shën Valentinit.

Kishte gjithashtu një konfuzion duke qenë se Rita është aktualisht në Australi, ndërkohë që prezantuesit britanikë Holly Willoughby dhe Phillip Schofield e prezantuan performancën e saj si të drejtpërdrejt, ani pse dukej se shfaqja ishte regjistruar paraprakisht.

Rita përndryshe vazhdon të gjykohet për faktin se ka shkelur rregullat anti-COVID me organizimin e festës së paligjshme të ditëlindjes, nëntorin e kaluar në restorantin “Casa Cruz” në lagjen Notting Hill.

Si rezultat, ajo u quajt ‘egoiste’ nga policia britanike. /Telegrafi/