Reshjet shkaktuan përmbytje në disa fshatra të Pejës

Shiu që ka filluar mbrëmë ka vërshuar shumë komuna të Kosovës të ketë vërshime. Në disa vende rrugët janë shndërruar në lumenj.

Pa kaluar 24 orë prej se filluan reshjet e shiut vërshimet filluan në disa fshatrat e Pejës.

Në Qallapek rrugët ishin shndërruar në lumenj derisa banorët hallin e kishin se mos uji iu hynte në shtëpi.

“Në fshatin tonë mbi 50% e shtëpive janë përfshirë nga uji. Kjo ka shkaktuar problem te ekonomitë familjare. Ka përmbytje të stallave dhe shtëpive të banueshme”, deklaroi për RTV Dukagjinin banori Atdhe Berisha.

“Mbrëmë prej orës 22:00 fshati Qallapek ka filluar të përmbytet. Edhe tash banorët janë në stres dhe ankth nga frika e futjes së ujit në shtëpia”, tha ai, përcjell Telegrafi.

Edhe fshati Krushec është në të njëjtën gjendje. Banori Adem Thaçi fajin po ua lë lumenjve.

“Ura është mjaft e ulët. Ndoshta gjendja do të ishte më e mirë pot ë ishte më e lartë ura”, thotë Adem Thaçi.

Drejtori i Shtabit Emergjent në Komunën e Pejës, Muhamet Mahmutaj thotë se faj për këto vërshime kanë edhe banorët pasi sipas tij kanë ngushtuar shtratin e lumit.

Edhe në fillim të vitit shumë komuna të Kosovës u përfshinë nga vërshimet si pasojë e reshjeve disaditore. Këto vërshime kanë pasur edhe kosto të madhe financiare për banorët./Telegrafi/