U fillua të njihej ndërkombëtarisht, 29 vjet më parë – cilat janë tetë vendet që ende nuk e kanë njohur Kroacinë?

Pikërisht 29 vjet më parë, Kroacia u njoh nga anëtarët e Bashkimit Evropian.

Dhe Gjermania, e cila së bashku me Vatikanin luajtën një rol kryesor në këto njohje, vendosën marrëdhënie diplomatike me Kroacinë më 15 janar, shkruan mediumi kroat Index.hr.

Sipas mediumit kroat, përcjell Telegrafi, kur Kroacia u njoh ndërkombëtarisht më 15 janar të vitit 1992, lufta ishte në zhvillim e sipër dhe pothuajse një e treta e vendit ishte nën okupim nga ushtria e atëhershme jugosllave dhe rebelët serbë.

Madje, Kroacia arriti deri te kufijtë e saj të njohur vetëm gjashtë vjet më vonë, pas riintegrimit paqësor të Sllavonisë Lindore dhe rajonit të Danubit.

Në mbrëmjen e njohjes, presidenti i parë kroat, Franjo Tuxhman, i tha kombit: “Sot – 15 janar 1992 – do të gdhendet me shkronja të arta në të gjithë historinë e popullit kroat në këtë zonë”.

Ai u tha bashkëpunëtorëve të tij: “Ne kemi krijuar një Kroaci të njohur ndërkombëtarisht. Ne po festojmë sonte dhe më pas po përveshim mëngët për ndërtimin e një shteti të ri demokratik”.

Njohja ndërkombëtare e Kroacisë pasoi gradualisht pas shpalljes së pavarësisë më 25 qershor të vitit 1991.

https://www.youtube.com/watch?v=USFKMU0kf7g&feature=emb_title

Deri atë ditë, Republika e Sllovenisë u shkëput nga Republika Socialiste Federale e Jugosllavisë (RSFJ), dhe të nesërmen shtetet e sapoformuara njohën njëri-tjetrin.

Procesi i shpërbërjes së Bashkimit Sovjetik u zhvillua paralelisht, i udhëhequr nga shtetet Baltike dhe Ukraina, të cilat njohën Kroacinë në vitin 1991, megjithëse në atë kohë ata vetë nuk ishin të njohura ndërkombëtarisht.

E para që e bëri këtë ishte Lituania më 30 korrik 1991, e ndjekur nga Ukraina më 11 dhjetor, Letonia më 14 dhjetor dhe Estonia më 31 dhjetor.

Gjithsesi, Islanda do të mbahet mend si vendi i parë i njohur ndërkombëtarisht që njohu Kroacinë (19 dhjetor 1991), dhe Gjermania bëri të njëjtën gjë në të njëjtën ditë, megjithëse me vendimin që njohja e saj do të hynte në fuqi më 15 janar 1992, së bashku me anëtarët e tjerë të BE-së.

Dy ditë para BE-së, më 13 janar 1992, Kroacia u njoh nga Vatikani.

Vatikani njoftoi njohjen e Kroacisë dhe Sllovenisë më 20 dhjetor 1991, me një dokument të veçantë sipas kërkesës kroate dhe sllovene për njohje diplomatike.

Më 3 tetor të vitit 1991, diplomacia e Vatikanit ishte e para në botë që njoftoi se po punonte për njohjen ndërkombëtare të Kroacisë.

Një ditë pas Selisë së Shenjtë, Kroacia u njoh nga San Marino, shkruan më tej Index.hr, përcjell Telegrafi.

Kjo u pasua në 15 janar të vitit 1992 me njohje nga Mbretëria e Bashkuar, Danimarka, Malta, Austria, Zvicra, Holanda, Hungaria, Norvegjia, Bullgaria, Polonia, Italia, Kanadaja, Franca, Spanja, Portugalia, Irlanda, Luksemburgu dhe Greqia.

Një ditë më pas, Argjentina, Australia, Republika Çeke, Kili, Lihtenshtajni, Zelanda e Re, Sllovakia, Suedia dhe Uruguai bënë të njëjtën gjë.

Në fund të janarit 1992, Kroacia ishte njohur nga shtatë vende të tjera – Finlanda, Rumania, Shqipëria, Bosnje dhe Hercegovina, Brazili, Paraguai dhe Bolivia.

Ndër të tjera, erdhën edhe njohjet e Rusisë (17 shkurt), Japonisë (17 mars), Shteteve të Bashkuara (7 prill), Izraelit (16 prill, megjithëse marrëdhëniet diplomatike u vendosën vetëm pesë vjet e gjysmë më vonë) dhe Kina 27 prill).

Vendi i parë aziatik që njohu Kroacinë ishte Irani (15 mars 1992) dhe nga Afrika ishte Egjipti (16 prill 1992).

Ndryshe, Kroacia u bë një anëtare e Kombeve të Bashkuara në 22 maj 1992 dhe anëtari i 28-të i BE-së më 1 korrik 2013.

Në fund të shkrimit, mediumi kroat vë në pah faktin se më 2 nëntor të vitit 2020, kur Kroacia ishte njohur nga Tuvalu, tetë vende nuk e kanë njohur ende zyrtarisht Kroacinë, as nuk kanë vendosur marrëdhënie diplomatike me këtë vend: Burundi, Butani, Sudani i Jugut, Liberia, Nigeri, Somalia, Republika e Afrikës Qendrore dhe Tongo. /Telegrafi/