Votimi i buxhetit 2021, Hoti: Kam diskutuar me grupet parlamentare

Gjatë ditës së sotme, kryeministri në detyrë i Kosovës, Avdullah Hoti ka kontaktuar grupet parlamentare për diskutuar rreth çështjes së buxhetit të vitit 2021.

Hoti thotë se është në pritje të përgjigjes, ndërkohë që ai thekson se presin bashkëpunim nga të gjithë rreth kësaj çështjeje.

“Unë kam kontaktuar grupet parlamentare po pres sot përgjigje nëse ka gatishmëri për këtë çështje dhe besoj që gjatë ditës do të definohet kjo çështje”, tha Hoti gjatë vizitës që kishte në Handikos.

Në rast se do të ketë kërkesa për ndryshim të buxhetit në linjat e ndryshme, atëherë një gjë e tillë Hoti thotë se e mirëpret duke theksuar se buxheti është shteti e jo i qeverisë.

“Kemi qenë gjithmonë të hapur t’i konsiderojmë të gjitha kërkesat e grupeve parlamentare sepse buxheti nuk është i qeverisë, buxheti është i shtetit të Kosovës dhe duhet të adresojë gjitha nevojat që ka shtetit”, deklaroi Hoti.

Lexo po ashtu Hoti: Kuvendi të mos shpërndahet pa u miratuar buxheti 2021, e kam diskutuar me grupet parlamentare për votimin e tij

Hoti është pyetur edhe se nga cilat grupe parlamentare pret më shumë bashkëpunim, me ç’rast ai tha se pret bashkëpunim nga të gjitha grupet parlamentare pa përjashtim.

Ai shtoi edhe se nuk duhet të hyhet në janar pa miratimin e buxhetit. Madje ai u bëri thirrje grupeve parlamentare që të shohin draft buxhetin i cili është në Kuvend e për të cilin mund të japin dhe sugjerime.

“Presim nga të gjitha grupet parlamentare pa asnjë përjashtim. Jemi në një situatë tani specifike, në prag të zgjedhjeve, nuk është mirë të hyhet më në janar pa buxhet të miratuar. Një draft-buxhet i përgatitur në mënyrë më të mirë mundshme është në Kuvend. Le të urdhërojnë grupet parlamentare nëse kanë sugjerime të ndryshme për të bërë ndryshime në atë draft buxhet dhe ta miratojnë”, deklaroi ai. /KP/