Ministria e Infrastrukturës: Të gjitha rrugët janë të kalueshme

Ministria e Infrastrukturës ka njoftuar se në shtatë regjionet e Kosovës, rrugët janë krejtësisht të lira për qarkullim.

“Në rajonin Prishtina 1 dhe 2 nuk ka reshje të borës dhe të gjitha rrugët janë të kalueshme. Në rajonin e Pejës, të gjitha rrugët janë të kalueshme dhe në gjendje normale, por që sipas nevojës, po bëhet shpërndarja e kripës në rrugët e viseve malore. Rrugët janë të kalueshme edhe në rajonin e Ferizajt. Infrastruktura rrugore e rajonit të Prizrenit po mirëmbahet dhe të gjitha rrugët janë të lira për qarkullim”, thuhet në njoftim.

Sipas MI-së, edhe në rajonin e Gjilanit nuk ka të reshura të borës dhe rrugët janë krejtësisht të qarkullueshme, me përjashtim të intervenimeve në zonat e ulëta dhe me mjegull.

Ndërkaq në autoudhën R6 Doganaj-Hani i Elezit, për shkak të temperaturave nën zero (-0) dhe lagështisë së krijuar në shtresa qarkulluese, është hedhur kripë, si preventivë në parandalimin e krijimit të ngricave në shtresa qarkulluese.

“Në përgjithësi, të gjitha rrugët të cilat mirëmbahen nga Ministria e Infrastrukturës, janë të kalueshme dhe të gatshme për qarkullim të lirë të automjeteve. Ministria e Infrastrukturës do të vazhdoj të iu mbajë të informuar edhe ditëve në vijim lidhur me gjendjen e rrugëve dhe mirëmbajtjen dimërore të tyre”, thuhet në njoftim. /Telegrafi/