I rrahin dhe madje ua ‘shkulin’ edhe thonjtë: Vuajtjet e migrantëve, Der Spiegel publikon pamjet e brutalitetit nga kufiri i Kroacisë

Gazeta gjermane Der Spiegel ka botuar një artikull në të cilin pretendohet se oficerët e policisë kroate rrahën migrantët ndërsa përpiqeshin të kalonin kufirin nga Bosnja dhe Hercegovina.

Përveç dëshmive të migrantëve, ata gjithashtu publikuan një video që tregon një migrant të rrahur në anën boshnjake të kufirit me pantallona të lagura dhe pa këpucë dhe një person me uniformë në anën tjetër, përcjell Telegrafi.

Kjo është vetëm një nga shumë dëshmitë në vitet e fundit në lidhje me dhunën e pretenduar nga oficerët e policisë kroate në kufirin me BeH.

Rrahjet, goditjet elektrike dhe madje “grisja” e thonjve të këmbëve janë disa nga akuzat e bëra nga migrantët kundër oficerëve të policisë kroate.

Këtë herë, shkruan Index.hr, Der Spiegel arriti të konfirmojë disa nga këto akuza dhe t’i vërtetojë ato me regjistrime.

Njëri nga rrëfimet që sjell mediumi gjerman është ai i Ibrahimit.

Pakistanezi i ri ishte nisur nga Kashmiri dy vjet më parë për të arritur në Evropë.

Por në një ditë të ftohtë në fund të marsit, policia kroate e tërhoqi zvarrë atë dhe refugjatët e tjerë nga automjeti, kujton Ibrahim.

Më shumë forca të sigurisë po prisnin jashtë ata vishnin “maska” të zeza për të fshehur fytyrat.

In the video, which was verified by @derspiegel @LHreports, soaked migrants can be seen, a Pakistani whimpers in pain. The men claim they have been beaten up by the masked Croatian police officers and forced across the border river. pic.twitter.com/91jyASzEyE

— Steffen Lüdke (@stluedke) November 18, 2020

Siç thuhet në shkrimin e mediumit gjerman, përcjell Telegrafi, burrat i detyruan refugjatët të hiqnin xhaketat, këpucët dhe pantallonat, dhe një nga një, burrat me kapuç u rreshtuan.

Një nga burrat me maska e kapi Ibrahimin për qafe dhe e tërhoqi atë drejt lumit, sipas kujtimeve të tij.

Të tjerët e rrahën, duke synuar shpinën, krahët dhe këmbët e Ibrahimit. “Ata po më rrihnin si të çmendur”, thotë ai.

Nga frika, ai kërkoi që të mos identifikohej me mbiemrin e tij në këtë artikull.

Ibrahimi kujton një degë të gjatë dhe të trashë që u lëndua veçanërisht keq kur u godit me të.

Tre refugjatë të tjerë thonë se ata u rrahën me një shufër metalike.

Rrahjet zgjatën disa minuta dhe burrat me kapuç e shtynë atë deri në lumin Glina, kufiri natyror midis Kroacisë dhe Bosnjë-Hercegovinës në fshatin Poljana.

Lumi është vetëm disa metra i gjerë atje.

“Shpejt, kërce”, bërtiti një nga burrat e maskuar në anglisht, thotë Ibrahim. “Kthehu në Bosnje!”.

Ndryshe, sipas Der Spiegel, përcjell Telegrafi, Bashkimi Evropian mbylli rrugën Ballkanike për migrantët në vitin 2016, pasi ajo ishte përdorur në muajt e mëparshëm nga qindra mijëra refugjatë nga Siria dhe vendet e tjera ndërsa po dilnin drejt Evropës Perëndimore.

Në anën tjetër të kufirit, zyrtarët kroatë patrullojnë kufirin. Por kjo nuk i ndalon refugjatët të niseshin çdo natë. /Telegrafi/