Nisma Socialdemokrate: Të gjithë e njohim figurën e Krasniqit, kjo që kemi parë sot ka qenë e panevojshme dhe traumatike për familjen

Sekretari i Nismë Socialdemokrate, Bilall Sherifi në një konferencë për media tha se ajo çfarë kanë parë sot ka qenë e panevojshme.

Sherifi në këtë konferencë theksoi se bastisja e shtëpisë së Jakup Krasniqit është bërë me urdhër të Dhomave të Specializuara.

“Ne të gjithë e njohim figurën emblematike të Jakup Ktrasniqit dhe ne vlerësojmë se kjo që kemi parë sot ka qenë e panevojshme”, tha ai, raporton Telegrafi.

Sipas tij, Krasniqi është një njeri që tërë jetën ja ka kushtuar drejtësisë, ka sakrifikuar lirinë e tij individuale në të gjitha etapat në funksion të lirisë kolektive.

Sherifi tha se Krasniqi gjithmonë i është përgjigjur ftesave të organeve të drejtësisë vendore e ndërkombëtare dhe veprimet e sotme ka qenë të panevojshme dhe traumatike për familjen. Ai tha se Kosova ka dhënë shembull të bashkëpunimit me drejtësinë ndërkombëtare dhe njëjtë do të vazhdojë edhe me Gjykatën Speciale.

Më tej, sekretari i Nismës theksoi se institucionet e Kosovës, Qeveria, Kuvendi e Presidenca duhet të jenë në funksion të përgjegjësive të veta dhe në funksion të mbrojtjes së luftës së drejtë të popullit të Kosovës. /Telegrafi/