Lushtaku: Me mujt, Albini të gjithëve na dërgon në burg

Sami Lushtaku, kryetar i degës së PDK-së në Skenderaj dhe ish komandant i UÇK-së, ka thënë se ai dhe shokët e tij të luftës janë të gatshëm të shkojnë vullnetarisht në Gjykatën Speciale dhe të kërkojnë dënim maksimal, vetën për një arsye.

“Vullnetarisht po shkojmë e po kërkojmë dënim maksimal, vetëm le të dalin ata që i kanë kryer këto masakra në Kosovë”, ka thënë Lushtaku në RTK.

Ai tutje ka folur për ata që në Kosovë po i gëzohen arrestimeve të pjesëtarëve të UÇK-së dhe po i dërgojnë në Hagë.

“Në momentin kur e kam dëgjuar Albin Kurtin duke i thënë presidentit ‘Hashim shko në Hagë’, jam rrënqethur”, ka thënë ai, duke e konsideruar këtë tepër të ulët.

“Hashimi ka qenë pjesëtar i UÇK-së dhe të çohet dhe t’i thotë shko në Hagë, është e rëndë për mua, është tmerruese. Me mujt Albini të gjithëve na dërgon në burg”, ka thënë Lushtaku.

I pyetur se çfarë raporti ka me Rexhep Selimin, deputetin e VV-së dhe ish ushtarin e UÇK-së, Lushtaku ka thënë se ka raporte të mira më të.

“Me Rexhën kam raporte të mira, flasim, rrimë bashkë ndonjëherë”, ka thënë ai.