Gomat e përdorura: Sa të sigurta janë ato?

Drejtuesit e mjeteve përpiqen të kursejnë para në çdo hap, edhe kur blejnë goma.

Për shumë, qëllimi është që të ulet sa më shumë kostoja e posedimit të një makine, por duhet pasur kujdes që të mos rrezikohet siguria juaj dhe e familjes suaj.

Shpesh mund të gjesh reklama për shitjen e gomave të përdorura, dhe kjo formë e tregtisë është bërë e njohur për shkak të standardit të ulët të jetesës dhe çmimeve më të ulëta të gomave të tilla.

Në Mbretërinë e bashkuar u testua cilësia e gomave të përdorura dhe dolën me një rezultat shqetësues: nga 129 goma të inspektuara individualisht, deri në 75% u vlerësuan si të pasigurta, transmeton Telegrafi.

Shoqata që zhvilloi kërkimin, TyreSafe , i deklaroi këto rezultate tragjike.

“Si është e mundur që tre të katërtat e gomave të përdorura në shitje janë të pasigurta? Meqenëse gomat janë pjesa e vetme e një automjeti në kontakt me asfalt, shitja e gomave të tilla shoferëve është e njëjtë me vendosjen e jetës së tyre në rrezik”, tha Stuart Jackson, presidenti i TyreSafe.

Ngjashëm me blerjen e sendeve të tjera të përdorura, vetëm në këtë rast fjala e rrezikshme duhet të merret fjalë për fjalë .

Disa prej nesh nuk mund të përballojnë goma të reja, por nëse tashmë po blini goma të përdorura, shikojini mirë.

Por edhe nëse po blini goma të përdorura, sigurohuni që ato të mos kenë dëmtime të dukshme, të cilat mund të ndikojnë në performancën e tyre. /Telegrafi/