Gjobiten dhe pezullohen bizneset që nuk zbatojnë masat e COVID-19 në Shqipëri

Task Forca anti-COVID-19 në Shqipëri ka vijuar punën në terren me masa të shtuara për kontrollin dhe monitorimin e zbatimit të protokolleve të sigurisë për frenimin e përhapjes së virusit.

Në 24 orët e fundit, Inspektorati Shtetëror Shëndetësor në bashkëpunim me grupet e tjera të Task Forcës, raportoi se ka realizuar 1,584 inspektime dhe monitorime në të gjitha qarqet e vendit.

Nga kontrollet janë marrë në total 4 masa administrative, 2 masa me gjobë në furrë buke, call center dhe 2 masa administrative për pezullim aktiviteti në fasoneri dhe institucion publik.

Masat administrative janë vendosur nga degët rajonale e Inspektoratit Shtetëror Shëndetësor në qarkun Tiranë, Dibër, Gjirokastër, Fier.

Në total gjatë kësaj periudhe janë kryer rreth 112 mijë inspektime dhe monitorime dhe janë vendosur mbi 400 masa administrative.

Ministria e Shëndetësisë dhe Mbrojtjes Sociale i bën apel bizneseve, të zbatojnë me korrektësi protokollet e sigurisë në punë: të dezinfektojnë ambientet, të kryejnë ajrosjen rregullisht, të përdoren maskat apo barrierat mbrojtëse në çdo subjekt shërbimi për qytetarët, siç e përcaktojnë protokollet e autoriteteve shëndetësore. Çdo shkelje do të konsiderohet me rrezik për shëndetin e qytetarëve dhe si e tillë do të ndëshkohet sipas ligjeve në fuqi.

Ministria e Shëndetësisë dhe Mbrojtjes Sociale apelon për vetëndërgjegjësim nga qytetarët që të jenë të kujdesshëm në zbatimin e masave të vendosura.